ఒంగోలు లాడ్జ్‌లో ప్రియురాలితో ఎంపీడీవో.. రెడ్‌హ్యాండెడ్‌గా పట్టుకున్న భార్య, పిల్లలు

భార్య, పిల్లల్ని పట్టించుకోవడం మానేసి ఓ మహిళతో ప్రేమాయణం నడుపుతున్న ఎంపీడీవోను కుటుంబ సభ్యులు ఓ లాడ్జ్‌లో రెడ్ హ్యాండెడ్‌గా పట్టుకున్నారు. శ్రీ పొట్టి శ్రీరాములు నెల్లూరు జిల్లాలో జరిగిందీ ఘటన. పోలీసుల కథనం ప్రకారం.. జిల్లాకు చెందిన ఎంపీడీవో ఒకరు గత సార్వత్రిక ఎన్నికల సమయంలో బదిలీపై చిత్తూరు వెళ్లారు. అక్కడ ఆయనకు ఏఎన్ఎం ఒకామె పరిచయమయ్యారు. ఆ పరిచయం మరింత సన్నిహితంగా మారడంతో ఎంపీడీవో తన కుటుంబాన్ని పట్టించుకోవడం మానేశారు. ఇంటికి కూడా దూరమయ్యారు.

ఈ నేపథ్యంలో ఎంపీడీవో కదలికలపై కుటుంబ సభ్యులు నిఘా పెట్టారు. ఈ క్రమంలో నిన్న మధ్యాహ్నం ఒంగోలులోని ఓ లాడ్జ్‌లో ఉన్నట్టు గుర్తించారు. కుమారుడు, కుమార్తెతో కలిసి లాడ్జ్‌కు వెళ్లిన భార్య.. భర్త, ఆయన ప్రియురాలిని రెడ్ హ్యాండెడ్‌గా పట్టుకుని గొడవకు దిగారు. లాడ్జ్‌లో గొడవపై సమాచారం అందుకున్న పోలీసులు వెంటనే అక్కడికి చేరుకుని వారిని పోలీస్ స్టేషన్‌కు తరలించారు. అక్కడ పోలీసులు వారికి కౌన్సెలింగ్ ఇచ్చారు. ఇలాంటి విషయాలతో రచ్చకెక్కి పరువు తీసుకోవద్దని, ఏదైనా ఉంటే కోర్టులో తేల్చుకోవాలని చెప్పి ఇంటికి పంపారు.