ఆగ‌స్టు 15న 'డబుల్ ఇస్మార్ట్'​.. మరి 'పుష్ప' వెనక్కి వెళ్లిన‌ట్లేనా...?

టాలీవుడ్‌ ఎనర్జిటిక్ స్టార్ రామ్ పోతినేని హీరోగా రూపొందుతున్న 'డబుల్ ఇస్మార్ట్' మూవీ విడుదల తేదీని తాజాగా మేకర్స్ ప్ర‌క‌టించారు. స్వాతంత్ర్య దినోత్స‌వం సంద‌ర్భంగా ఆగస్టు 15వ తేదీన సినిమాను విడుద‌ల చేస్తున్నట్లు ఓ స్పెషల్ పోస్టర్ ద్వారా తెలియ‌జేశారు. 

'ఇస్మార్ట్‌ శంకర్‌'కు సీక్వెల్‌గా వ‌స్తున్న ఈ చిత్రంపై అభిమానుల్లో భారీ అంచనాలు నెల‌కొన్నాయి. తొలి పార్ట్ సూప‌ర్‌ హిట్ కావడంతో ద‌ర్శ‌కుడు పూరీ జ‌గ‌న్నాధ్ సైతం ఈ మూవీపై మరింత దృష్టిసారించిన‌ట్లు స‌మాచారం. రామ్‌తో కావ్య థాప‌ర్ జోడి క‌డుతున్న ఈ సినిమాలో సంజ‌య్ ద‌త్, శాయాజీ షిండే, గెట‌ప్ శ్రీను త‌దితరులు ఇత‌ర కీలక పాత్రల్లో న‌టిస్తున్నారు. మెలోడీ బ్ర‌హ్మ మ‌ణిశ‌ర్మ సంగీతం అందిస్తున్నారు. అలాగే ఈ మూవీని చార్మీ కౌర్, పూరీ జ‌గ‌న్నాధ్ సంయుక్తంగా నిర్మిస్తున్నారు.

ఇక, ఆగస్టు 15న విడుదల కావాల్సిన 'పుష్ప 2' వాయిదా పడ్డట్లు తెలుస్తోంది. ఈ రూమర్స్ గురించి క్లారిటీ రానప్పటికీ... 'డబుల్ ఇస్మార్ట్' రిలీజ్ అనౌన్స్ తో 'పుష్ప' సీక్వెల్ వాయిదా పడ్డట్లే అని అర్ధమవుతోంది.