‘హరిహర వీరమల్లు’ దర్శకుడిగా క్రిష్ స్థానంలో మరొకరు!

పవర్ స్టార్ పవన్ కల్యాణ్ హీరోగా తెరకెక్కుతున్న పీరియాడికల్ యాక్షన్ ఫిల్మ్ 'హరిహర వీరమల్లు' నుంచి తాజాగా విడుదలైన టీజర్ ఆకట్టుకుంది. పేదల పక్షాన నిలబడి పోరాడే యోధుడిగా పవన్ ఇందులో కనిపిస్తున్నారు. ఈ సినిమాకు దర్శకుడు క్రిష్ జాగర్లమూడి. అయితే టీజర్ విడుదల సందర్భంగా నిర్మాతలు ఒక కీలక ప్రకటన చేశారు. ఈ చిత్రం మిగిలిన షూటింగ్ ను, పోస్ట్ ప్రొడక్షన్ వర్క్ ను దర్శకుడు జ్యోతికృష్ణ పూర్తి చేస్తారని తెలిపారు. పోస్ట్ ప్రొడక్షన్ పనులను కూడా క్రిష్ పర్యవేక్షణలో జ్యోతికృష్ణ చేస్తారని వెల్లడించారు. సినిమా పూర్తి చేయడంలో ఊహించని జాప్యం జరిగిన కారణంగానే ఈ నిర్ణయం తీసుకున్నామని చెప్పారు. 

ఈ చిత్రాన్ని 17వ శతాబ్దంలో సాగే నేపథ్యంలో రెండు భాగాలుగా తీసుకురానున్నారు. 'స్వోర్డ్ వర్సెస్ స్పిరిట్' పేరుతో పార్ట్ వన్ ఈ ఏడాది చివర్లో ప్రేక్షకుల ముందుకు రానుంది. ఈ చిత్రంలో పవన్ సరసన నిధి అగర్వాల్ కథానాయికగా నటిస్తోంది. బాబీ డియోల్, సునీల్, నోరా ఫతేహి తదితరులు కీలక పాత్రలను పోషిస్తున్నారు. కీరవాణి ఈ చిత్రానికి సంగీతం అందిస్తున్నారు.