రకుల్ ప్రీత్ సింగ్ కు స్పెషల్ విషెస్ చెప్పిన ఆమె ప్రియుడు

దక్షిణాది సినీ పరిశ్రమలో రకుల్ ప్రీత్ సింగ్ ది ఒక ప్రత్యేకమైన స్థానం. 'వెంకటాద్రి ఎక్స్ ప్రెస్' సినిమా ద్వారా టాలీవుడ్ లోకి ఎంట్రీ ఇచ్చిన రకుల్ తక్కువ కాలంలోనే స్టార్ హీరోయిన్ గా ఎదిగింది. ఆ తర్వాత టాప్ హీరోల సరసన నటించింది. దక్షిణాదిన ఇతర భాషల్లో సైతం సత్తా చాటింది. ఇదే సమయంలో బాలీవుడ్ ఛాన్సులను కూడా పట్టేసింది. మరోవైపు బాలీవుడ్ నటుడు జాకీ భగ్నానీతో రకుల్ ప్రేమలో ఉన్న సంగతి తెలిసిందే. వీరు సన్నిహితంగా ఉన్న పలు ఫొటోలు సోషల్ మీడియాలో వైరల్ అయ్యాయి. 

ఇంకోవైపు రకుల్ నిన్న 32వ వసంతంలోకి అడుగుపెట్టింది. ఈ సందర్భంగా తన ప్రియురాలికి జాకీ ప్రత్యేకంగా విషెస్ తెలియజేశాడు. ఇద్దరూ కలిసి ఉన్న ఒక వీడియోను రిలీజ్ చేసి రకుల్ కు సర్ ప్రైజ్ ఇచ్చాడు. తనను ఎప్పుడూ ఆశ్చర్యానికి గురి చేసే వ్యక్తి పట్ల తనకున్న అభిమానాన్ని, ప్రేమను తెలియజేయాలనుకుంటున్నానని ఇన్స్టాలో రాసుకొచ్చాడు. నీతో ఉంటే ప్రతి రోజూ ఒక అద్భుతమైన ప్రయాణంలా ఉంటుందని చెప్పాడు. ప్రతి అడుగులో నువ్వే నా భాగస్వామి అని తెలిపాడు. తన జీవితంలో ప్రేమ, సంతోషాన్ని నింపే వ్యక్తివి నీవే అని చెప్పాడు. నీ కలలన్నీ నిజమవ్వాలని ఈ ప్రత్యేకమైన రోజున కోరుకుంటున్నానని తెలిపాడు. ప్రతి రోజును ప్రత్యేకంగా మార్చే వ్యక్తికి పుట్టినరోజు శుభాకాంక్షలు అని చెప్పాడు.