విమాన ప్రయాణికుడి దురుసు ప్రవర్తన...బాత్రూమ్‌ లోపలి నుంచి లాక్ చేసుకున్న వైనం

హైదరాబాద్ నుంచి పాట్నా వెళుతున్న ఇండిగో ఎయిర్‌లైన్స్‌ విమానంలో ఓ ప్రయాణికుడు సిబ్బందితో దురుసుగా ప్రవర్తించాడు. బాత్రూమ్‌లోకి వెళ్లి లోపలి నుంచి గడియ పెట్టుకుని హల్‌చల్ సృష్టించాడు. పాట్నాలో విమానం ల్యాండవగానే పోలీసులు అతడిపై కేసు నమోదు చేశారు. అయితే, ప్రయాణికుడు మానసిక సమస్యలతో బాధపడుతున్నట్టు పోలీసులు తెలిపారు. 6ఈ 126 విమానంలో ఇటీవల ఈ ఘటన చోటుచేసుకుంది. 

ప్యాసింజర్‌ను కమార్ రియాజ్‌గా పోలీసులు గుర్తించారు. తన సోదరుడితో కలిసి అతడు విమానంలో పాట్నాకు బయలుదేరాడు. అయితే, ప్రయాణికుడికి మానసిక సమస్యలు ఉన్నట్టు పోలీసులు తెలిపారు. ప్రస్తుతం అతడు ట్రీట్‌మెంట్ తీసుకుంటున్నాడని, మెడికల్ రిపోర్టులు అతడి వద్ద ఉన్నాయని తెలిపారు. విమాన సిబ్బంది ఫిర్యాదు మేరకు అతడిని అదుపులోకి తీసుకున్నట్టు పోలీసులు తెలిపారు. ఘటనపై దర్యాప్తు జరుపుతున్నామని పేర్కొన్నారు.