Vijay Antony: జీవితంలో ఎక్కడ గెలిచినా చావు దగ్గర ఓడిపోవలసిందే: 'హత్య' ట్రైలర్ డైలాగ్

విజయ్ ఆంటోని హీరోగా తన కెరియర్ మొదలైన దగ్గర నుంచి, విభిన్నమైన కథలను .. పాత్రలను ఎంచుకుంటూ వెళుతున్నాడు. ఇటీవల ఆయన నుంచి వచ్చిన 'బిచ్చగాడు 2' భారీ విజయాన్ని నమోదు చేసింది. ఆ తరువాత ప్రాజెక్టుగా ఆయన చేసిన సినిమానే 'హత్య'. టైటిల్ తోను .. ఫస్టులుక్ పోస్టర్ తోను ఆయన ఈ సినిమాపై ఆసక్తిని రేకెత్తించాడు. 

బాలాజీ కుమార్ దర్శకత్వం వహించిన ఈ సినిమాలో ఆయన డిటెక్టివ్ గా కనిపించనున్నాడు. ఈ నెల 21వ తేదీన ఈ సినిమా విడుదల కానుంది. ఈ నేపథ్యంలో కొంతసేపటి క్రితం, ఈ సినిమా నుంచి ట్రైలర్ ను రిలీజ్ చేశారు. 'జీవితంలో ఎక్కడ గెలిచినా చావు దగ్గర ఓడిపోవలసిందే' అనే డైలాగ్ తో ఈ ట్రైలర్ మొదలవుతోంది. 

లైలా అనే ఒక మోడల్ హత్య చుట్టూ ఈ కథ తిరుగుతుందనీ .. ఈ మర్డర్ మిస్టరీని ఛేదించడానికి హీరో రంగంలోకి దిగుతాడనే విషయం ట్రైలర్ ను బట్టి అర్థమవుతోంది. రితిక సింగ్ - మీనాక్షి చౌదరి కథానాయికలుగా కనిపించనున్న ఈ సినిమాలో, మురళీశర్మ .. రాధిక శరత్ కుమార్ ముఖ్యమైన పాత్రలను పోషించారు.