హిట్ టాక్ తెచ్చుకున్న పీఎస్2.. తొలి రోజు కలెక్షన్ ఎంతంటే..!

దిగ్గజ దర్శకుడు మణిరత్నం కలల ప్రాజెక్ట్ పొన్నియన్ సెల్వన్ 2 చిత్రం శుక్రవారం ప్రపంచ వ్యాప్తంగా విడుదలైంది. పార్ట్ 1 భారీ విజయం అందుకోవడంతో రెండో భాగంపై భారీ అంచనాలు నెలకొన్నాయి. చియాన్ విక్రమ్, జయం రవి, కార్తీ, ఐశ్వర్య రాయ్ బచ్చన్, త్రిష, శోభితా ధూళిపాల, ఐశ్వర్య లక్ష్మీ తదితరులు నటించిన ఈ చిత్రం రెండో భాగం ప్రపంచవ్యాప్తంగా రికార్డు థియేటర్లలో రిలీజైంది. మొదటి రోజే హిట్ టాక్ తెచ్చుకుంది. తమిళంలో 60 శాతం ఆక్యుపెన్సీ, హిందీలో 10 శాతం, మలయాళంలో 34 శాతం, తెలుగులో 35 శాతం, కన్నడలో 25 శాతం ఆక్యుపెన్సీ నమోదైంది. 

ఈ చిత్రం మొదటి రోజున రూ. 38 కోట్లు వసూలు చేసింది. తమిళనాడులో రూ. 25 కోట్లు రాబట్టింది. ఏపీ, తెలంగాణలో రూ. 3–4 కోట్లు వచ్చినట్టు తెలుస్తోంది. కర్ణాటకలో మరో రూ. 4-5 కోట్లు వసూలైనట్టు ట్రేడ్ వర్గాలు చెబుతున్నారు. వారాంతం అయిన శని, ఆదివారాల్లో వసూళ్లు పెరిగే అవకాశం ఉంది. కాగా, పీఎస్1 భారత్ లో దాదాపు రూ. 327 కోట్లు, విదేశాల్లో రూ.169 కోట్లు వసూలు చేసింది.