కుప్పకూలిన ఎయిర్ అంబులెన్స్... రోగి సహా ఐదుగురి మృత్యువాత

అమెరికాలో విషాద ఘటన చోటుచేసుకుంది. నెవాడాలో ఓ ఎయిర్ అంబులెన్స్ కూలిన ఘటనలో ఐదుగురు దుర్మరణం పాలయ్యారు. రోగి కూడా మృత్యువాత పడినట్టు అధికారులు తెలిపారు. అమెరికాలో మంచు తుపాను విజృంభిస్తోంది. ఈ కారణంగా విమానం ప్రయాణించేందుకు అనుకూల పరిస్థితులు లేకపోవడంతో ఈ ప్రమాదం జరిగినట్టు అంచనా వేస్తున్నారు. 

కాగా, నెవాడా సరిహద్దుల్లోకి వచ్చేసరికి విమానం రాడార్ తో సంబంధాలు కోల్పోయింది. సెంట్రల్ లియోన్ కౌంటీలో ఈ ఘటన జరిగినట్టు తెలుస్తోంది. ప్రమాద సమయంలో ఎయిర్ అంబులెన్స్ విమానంలో పైలెట్, రోగి, రోగి సహాయకుడు, నర్సు, పారామెడికల్ నిపుణుడు ఉన్నారు. వీరందరూ ప్రాణాలు కోల్పోయినట్టు సెంట్రల్ లియోన్ కౌంటీ అధికారులు నిర్ధారించారు.