Chiranjeevi: షూటింగ్ లో శ్రుతి హాసన్ ఎక్కువ ప్రభావానికి గురైంది: సుస్మిత

వాల్తేరు వీరయ్య సినిమాలో పాటలను విదేశాల్లో గడ్డకట్టే చలిలో షూటింగ్ చేయాల్సి వచ్చిందని మెగాస్టార్ చిరంజీవి కూతురు, ఈ సినిమాకు కాస్ట్యూమ్ డిజైనర్ అయిన సుస్మిత చెప్పారు. ఇందుకోసం అందరూ చాలా ఇబ్బంది పడ్డారని అన్నారు. చలి బారి నుంచి రక్షించుకునేందుకు తాము పైనుంచి కింది వరకు దుస్తులతో కప్పేసుకున్నామని ఓ ఇంటర్వ్యూలో చెప్పారు. చిరంజీవి, శ్రుతిహాసన్‌, బ్యాగ్రౌండ్‌ డ్యాన్సర్లు మాత్రం చాలా ఇబ్బందిపడ్డారు. పెద్ద పెద్ద జాకెట్లతో కవర్‌ చేసుకున్న వాళ్లంతా షాట్‌ రెడీ అనగానే వాటిని తీసేసి షూటింగ్ లో పాల్గొనాల్సి వచ్చిందన్నారు. ఒక్కో షాట్‌కు చాలా సమయం పట్టిందని, అందరికన్నా ఎక్కువ శ్రుతిహాసన్‌ చలి ప్రభావానికి ఎక్కువ గురయ్యారని తెలిపారు. పాటల షూటింగ్ లో ఆమె ఉల్లిపొర లాంటి చీర ధరించి, అందంగా కనిపించారన్నారు. కానీ చలికి తట్టుకోలేకపోయారని సుస్మిత వెల్లడించారు.

 ఈ చిత్రంలో లుంగీ, స్పోర్ట్స్‌ షూస్‌, కళ్లద్దాలతో చిరంజీవి బాగా కనిపించారని చెప్పారు. ఆయన ఎలాంటి దుస్తుల్లో అయినా బాగానే ఉంటారని, షూస్‌, జీన్స్‌, లెదర్‌ జాకెట్‌ వేసుకున్నప్పుడు ఇంకా అందంగా కనిపించారని తెలిపారు. ఇక, రామ్ చరణ్  పర్సనల్‌ స్టైల్‌ స్టేట్‌మెంట్‌ అద్భుతంగా ఉంటుందని సుస్మిత చెప్పారు.  తనకు సరిపోయే దుస్తులను ఎంచుకోవడంలో మంచి నైపుణ్యం ఉందని, మన సంస్కృతిని ప్రతిబింబిస్తూనే, పాశ్చాత్య శైలికి దగ్గరగా ఉంటుందని అన్నారు. తమ కుటుంబంలో ప్రతి ఒక్కరికీ వస్త్రధారణలో వాళ్లకంటూ సొంత శైలి ఉందని సుస్మిత వెల్లడించారు. బాబాయ్‌ పవన్‌ కల్యాణ్‌ అయితే యూత్‌లో ట్రెండ్‌ సెట్టర్‌ అన్నారు, ఆయనది యూనిక్‌ స్టైల్‌ అని, తను చెప్పులు వేసుకొని నడిచినా అందులో ఓ స్టైల్‌ ఉంటుందని చెప్పారు.