ప్రభాస్ జోడీగా చేయడానికి ఓకే చెప్పిన అనుష్క?

ప్రభాస్ - అనుష్క కలిసి కొన్ని సినిమాల్లో నటించారు. ఈ ఇద్దరినీ తెరపై చూసిన ఆడియన్స్ 'జోడీ' అంటే ఇదే అనుకున్నారు. అందుకు తగినట్టుగానే ఆ సినిమాలు భారీ విజయాలను అందుకున్నాయి. 'బాహుబలి 2' తరువాత ఈ జంట తెరపై మళ్లీ కనిపించలేదు. ఈ జంటను మళ్లీ తెరపై చూడటానికి అభిమానులు ఉత్సాహాన్ని చూపుతున్నారు. 

అలాంటి అభిమానుల కోరిక త్వరలో నెరవేరనుందని తెలుస్తోంది. 'నిశ్శబ్దం' తరువాత అనుష్క మరో సినిమా చేయలేదు. ఒక సినిమా ఏదో ఒప్పుకుందని అన్నారుగానీ అందుకు సంబంధించిన అప్ డేట్స్ లేవు. ఈ నేపథ్యంలో ఆమెను దర్శకుడు మారుతి ఒప్పించినట్టుగా ఒక వార్త షికారు చేస్తోంది. ఇప్పుడు ఇండస్ట్రీలో ఇదే టాక్ నడుస్తోంది.  

దర్శకుడు మారుతి .. ప్రభాస్ హీరోగా ఒక సినిమా చేయనున్నాడు. ఈ సినిమాకి 'రాజా డీలక్స్' అనే టైటిల్ ను ఖరారు చేశారు. ఈ సినిమాలో నాయిక అనుష్క అయితే ఈ ప్రాజెక్టుకు మరింత ప్లస్ అవుతుందని భావించిన ఆయన, ఆమెను ఒప్పించినట్టుగా తెలుస్తోంది. మొదట్లో ఇది పుకారు మాత్రమే అనుకున్నా, ఇది నిజమే అనే మాట ఇప్పుడు ఇండస్ట్రీలో బలంగానే వినిపిస్తోంది. మారుతి ఏం చెబుతాడో చూడాలి మరి.