Woman: "సర్ ప్రైజ్" అంటూ కళ్లు మూసుకోమని చెప్పి, కాబోయే భర్త గొంతుకోసిన యువతి

పెళ్లి ఇష్టం లేని ఓ యువతి దారుణ చర్యకు పాల్పడింది. కాబోయే భర్తను అంతమొందించేందుకు ప్రయత్నించింది. ఈ ఘటన జరిగింది ఎక్కడో కాదు... అనకాపల్లి జిల్లా రావికమతంలో. పెద్దలు కుదిర్చిన పెళ్లి ఏమాత్రం ఇష్టంలేని యువతి భయంకరమైన పథక రచన చేసింది. 

'నీతో మాట్లాడాలి, ఓసారి రా' అంటూ కాబోయే భర్తకు ఫోన్ చేసింది. వెంటనే ఆ యువకుడు రావడంతో, అతనిని సాయిబాబా గుడి వున్న కొండపైకి తీసుకెళ్లింది. తర్వాత 'సర్ ప్రైజ్' అంటూ కళ్లు మూసుకోవాలని కోరింది. కాబోయే భార్య అడగడంతో అతడు వెంటనే కళ్లు మూసుకున్నాడు. 

ఇదే అదనుగా ఆ యువతి తనతో పాటు తెచ్చుకున్న పదునైన చాకుతో అతడి గొంతుకోసింది. తీవ్ర రక్తస్రావం కావడంతో యువకుడి పరిస్థితి విషమంగా మారింది. అతడిని అనకాపల్లిలోని ప్రైవేటు ఆసుపత్రికి తరలించారు. 

కాగా, ఆ యువకుడి పేరు రాము నాయుడు, అతడి స్వస్థలం పాడేరు. ఆ యువతిది రావికమతం. వీరి పెళ్లి వచ్చే నెల 28న జరగాల్సి ఉంది. తాజా ఘటన నేపథ్యంలో యువకుడి బంధువుల ఫిర్యాదు మేరకు పోలీసులు ఆ యువతిని అదుపులోకి తీసుకుని విచారిస్తున్నారు.