హైద‌రాబాద్‌లో భారీగా డ్ర‌గ్స్ ప‌ట్టివేత‌.. రెండు ముఠాల అరెస్ట్‌

భాగ్య‌న‌గ‌రి హైద‌రాబాద్‌లో మ‌రోమారు డ్ర‌గ్స్ క‌ల‌క‌లం రేగింది. డ్ర‌గ్స్ అధిక మోతాదులో సేవించిన కార‌ణంగా ఆసుప‌త్రిలో చికిత్స పొందుతూ ఓ యువ‌కుడు చ‌నిపోయిన ఘ‌ట‌న వెలుగు చూసిన వెనువెంట‌నే.. న‌గ‌రంలో భారీ స్థాయిలో డ్ర‌గ్స్ ప‌ట్టుబ‌డ్డాయి. న‌గ‌రంలోని జూబ్లీహిల్స్‌, న‌ల్ల‌కుంట ప‌రిధిలో డ్ర‌గ్స్ విక్ర‌యిస్తున్న‌ట్లుగా స‌మాచారం అందుకున్న పోలీసులు.. రెండు ప్రాంతాల్లో రెండు ముఠాల‌ను అరెస్ట్ చేశారు. ఈ ముఠాల నుంచి ఎల్ఎస్‌డీ, హ్యాష్ అయిల్ స‌హా భారీ మొత్తంతో డ్ర‌గ్స్‌ను పోలీసులు స్వాధీనం చేసుకున్నారు. 

ఇదిలా ఉంటే.. న‌ల్ల‌కుంట ప‌రిధిలో పోలీసుల‌కు చిక్కిన ముఠాలోని ఓ వ్య‌క్తిని డ్ర‌గ్స్ విక్రేత‌గా గుర్తించ‌గా.. అత‌డి వ‌ద్ద డ్ర‌గ్స్ కొనుగోలు చేసేందుకు వ‌చ్చిన ముగ్గురు యువ‌కుల‌ను పోలీసులు అరెస్ట్ చేసిన‌ట్లుగా తెలుస్తోంది. ఇక జూబ్లీహిల్స్‌లో ప‌ట్టుబ‌డిన గ్యాంగ్‌లో ఎంత‌మంది ఉన్నార‌న్న విష‌యంపై వివ‌రాలు తెలియ‌రాలేదు.