అవి ప్రమాదంలో తగిలిన గాయాలు కాదు: మంచు లక్ష్మి

టాలీవుడ్ నటి, నిర్మాత మంచు లక్ష్మి ప్రస్తుతం మోహన్ లాల్ నటిస్తున్న ఓ  మలయాళ చిత్రంలో కీలకపాత్ర పోషిస్తున్నారు. ఆమె తాజాగా ఇన్ స్టాగ్రామ్ లో పోస్టు చేసిన కొన్ని ఫొటోలు అభిమానులను ఆందోళనకు గురిచేశాయి. మంచు లక్ష్మి చేతికి, కాలికి గాయాలు తగిలి ఉండడం ఆ ఫొటోల్లో కనిపించింది. దాంతో ఆమె ప్రమాదానికి గురై ఉంటుందని భావించిన అభిమానులు పెద్ద ఎత్తున స్పందించారు.

ఈ నేపథ్యంలో మంచు లక్ష్మి వివరణ ఇచ్చింది. అవి ప్రమాదంలో తగిలిన గాయాలు కాదని స్పష్టం చేసింది. ఆ ఫొటోలు ఓ సినిమాకు సంబంధించినవని వెల్లడించింది. ఎలాంటి ప్రమాదం జరగలేదని పేర్కొంది. తన పట్ల ఇంతమంది ప్రేమాభిమానులు ప్రదర్శించడం తనను ముగ్ధురాలిని చేస్తోందని మంచు లక్ష్మి వివరించింది.