పునీత్ కు ఇష్టమైన వెజ్, నాన్ వెజ్ వంటకాలతో పుణ్యతిథి నిర్వహించిన కుటుంబ సభ్యులు

కన్నడ హీరో పునీత్ రాజ్ కుమార్ గత నెలలో మరణించగా, హిందూ మతాచారాలను అనుసరించి కుటుంబ సభ్యులు వివిధ క్రతువులు నిర్వహిస్తున్నారు. ఈ క్రమంలో పునీత్ మరణించిన అనంతరం 11వ రోజున ఆయన సమాధి వద్ద పుణ్యతిథి కార్యక్రమం నిర్వహించారు. పునీత్ అమితంగా ఇష్టపడే శాకాహార, మాంసాహార వంటకాలను సమాధి వద్ద ఉంచారు. మొత్తం 30 రకాల వంటకాలను సిద్ధం చేసి సమాధి వద్ద సమర్పించారు.

ఈ పుణ్యతిథి కార్యక్రమానికి పునీత్ అర్ధాంగి అశ్విని, కుమార్తెలు వందిత, ధృతి, సోదరులు శివరాజ్ కుమార్, రాఘవేంద్ర రాజ్ కుమార్ తదితరులు హాజరయ్యారు. కర్ణాటక సీఎం బసవరాజ్ బొమ్మై కూడా ఈ కార్యక్రమానికి విచ్చేశారు. ఈ సందర్భంగా నటుడు శివరాజ్ కుమార్ మరోసారి తమ్ముడి విషాదాంతంతో తీవ్ర భావోద్వేగాలకు లోనయ్యారు. పునీత్ తనకు బిడ్డలాంటి వాడని, పునీత్ పద్మశ్రీ కాదు అమరశ్రీ అని పేర్కొన్నారు. పునీత్ ఎక్కడికీ వెళ్లలేదని, ప్రతి ఒక్కరి మనసులో సజీవంగా ఉన్నాడని అన్నారు.