రామ్ జోడీగా 'రొమాంటిక్' హీరోయిన్!

తెలుగు తెరకి త్వరలో పరిచయం కానున్న కథానాయికలలో 'కేతిక శర్మ' ఒకరు. ఆకాశ్ పూరి జోడీగా ఈ బ్యూటీ 'రొమాంటిక్' సినిమా చేసింది. ఈ సినిమా నుంచి వచ్చిన ఈ సుందరి ఫస్టులుక్ చూసి కుర్రాళ్లు ఫిదా అయ్యారు. అయితే కరోనా కారణంగా ఈ సినిమా విడుదల విషయంలో జాప్యం జరుగుతూ వచ్చింది.

ఇక ఈ సినిమా విడుదల కాకముందే ఈ అమ్మాయి మరో రెండు ప్రాజెక్టులకు సైన్ చేసింది. నాగశౌర్య సరసన నాయికగా 'లక్ష్య' సినిమాను కూడా పూర్తి చేసిన ఈ అమ్మాయి, వైష్ణవ్ తేజ్ జోడీగా ఒక సినిమా చేస్తోంది. 'రొమాంటిక్' సినిమా వచ్చేనెల 4వ తేదీన ప్రేక్షకుల ముందుకు రానుంది.

ఇక 'లక్ష్య' సినిమా కూడా త్వరలోనే థియేటర్లకు వస్తుంది. వైష్ణవ్ తేజ్ తో చేస్తున్న సినిమా షూటింగు దశలో ఉంది. ఈ నేపథ్యంలోనే ఈ కేతిక మరో ఛాన్స్ ను కోట్టేసింది. రామ్ నెక్స్ట్ సినిమాలో ఆమె కథానాయికగా ఎంపిక అయిందని అంటున్నారు. ప్రస్తుతం రామ్ .. లింగుసామి దర్శకత్వంలో ఒక సినిమా చేస్తున్న సంగతి తెలిసిందే.