Asha Bhosle: సింగర్ ఆశాభోంస్లే రెస్టారెంట్లో.. హాలీవుడ్ హీరో భోజనం!

ప్రముఖ బాలీవుడ్ సింగర్ ఆశాభోంస్లే బ్రిటన్‌లోని బర్మింగ్‌హామ్‌లో ఆశా’స్ అనే రెస్టారెంట్ ను ప్రారంభించిన సంగతి తెలిసిందే. చడీచప్పుడూ లేకుండా తాజాగా ఈ రెస్టారెంట్‌కు ప్రఖ్యాత హాలీవుడ్ యాక్షన్ హీరో టామ్ క్రూయిజ్ వచ్చారు. సడెన్‌గా రెస్టారెంట్‌కు వచ్చిన టామ్.. హల్ చల్ చేయొద్దని, ప్రశాంతంగా భోజనం చేయడానికి వచ్చానని అక్కడి సిబ్బందికి చెప్పాడట. అలాగే తనను సాధారణ కస్టమర్‌గానే భావించాలని సూచించాడట.

ఆ తర్వాత చికెన్ టిక్కా మసాలా ఆర్డర్ ఇచ్చిన టామ్.. అది బాగా నచ్చడంతో ఎక్స్‌ట్రా స్పైసీగా ఉండేలా మరో ప్లేటు కూడా ఆర్డర్ ఇచ్చి తిన్నాడట. ఈ విషయం తెలిసిన ఆశాభోంస్లే.. ట్విట్టర్ వేదికగా ఈ సర్‌ప్రయిజ్‌ను బయటపెట్టారు. తన రెస్టారెంట్లో టామ్ క్రూయిజ్ భోజనం చేసినట్లు తెలిసి చాలా సంతోషించానని భోంస్లే ట్వీట్ చేశారు. ఆయన మరోసారి రెస్టారెంటుకు వచ్చే రోజు కోసం ఎదురు చూస్తుంటానని చెప్పారు. ఈ ట్వీట్‌తోపాటు తన రెస్టారెంట్ నుంచి టామ్ బయటకు వెళ్తున్న ఫొటోను కూడా ఆమె షేర్ చేశారు.

రెస్టారెంట్లో టామ్ రెండు గంటలపాటు ఉన్నట్లు తెలిపిన మేనేజర్ నోమన్ ఫరూఖీ.. ఆయన భోజనం ముగించి వెళ్లే సమయంలో ఫొటో తీసుకోవడానికి అంగీకరించినట్లు చెప్పారు. ఆ తర్వాత హోటల్ బయట సామాజిక దూరం పాటిస్తూ, మాస్క్ ధరించి ఒక ఫొటో దిగిన ఈ యాక్షన్ హీరో..  ఆ తర్వాత మాస్కు తీసేసి మరో ఫొటో దిగినట్లు ఫరూఖీ వెల్లడించారు. కాగా, టామ్ క్రూయిజ్ ప్రస్తుతం ‘మిషన్ ఇంపాజిబుల్ 7 ’ చిత్రం షూటింగ్‌లో పాల్గొంటున్నారు. ఈ సినిమా షూటింగ్ ఫిబ్రవరి 7న ప్రారంభమైంది.