పాకిస్థాన్ లో భలే మామిడిపండ్లు... షుగర్ బాధితులు కూడా తినొచ్చట!

ఫలరాజు మామిడి అంటే ఎవరికైనా నోరూరాల్సిందే. అయితే, మధుమేహ బాధితులు మాత్రం ఇష్టంవచ్చినట్టు మామిడిపండ్లు తినలేక ఉసూరుమంటుంటారు. మామిడిపండ్లలో చక్కెర శాతం అధికంగా ఉండడమే అందుకు కారణం. అయితే, పాకిస్థాన్ లో ఓ రైతు చక్కెర శాతం అతి తక్కువగా ఉండే ప్రత్యేకమైన మామిడి రకాలను సాగు చేస్తున్నారు. వీటిని సోనారో, కీట్, గ్లెన్ అని పిలుస్తారు. కీట్ రకంలో చక్కెరశాతం 4.7, సోనారో రకంలో 5.6 శాతం, గ్లెన్ రకంలో 6 శాతం ఉంటుందట. ఇవి కిలో రూ.150 ధర పలుకుతున్నాయి.

పాకిస్థాన్ లోని సింధ్ ప్రాంతంలో ఓ ప్రైవేటు వ్యవసాయ క్షేత్రంలో శాస్త్రీయ మార్పులు చేసిన ఈ మామిడి రకాలను సాగు చేస్తున్నారు. విదేశాల నుంచి దిగుమతి చేసుకున్న మామిడి రకాలను శాస్త్రీయ ప్రక్రియలతో షుగర్ బాధితులు కూడా తినేలా మార్పు చేసినట్టు రైతు గులాం సర్వర్ వెల్లడించారు.