ఫస్టుకాపీ రెడీ చేస్తున్న 'నారప్ప'

మొదటి నుంచి కూడా వెంకటేశ్ రీమేక్ సినిమాలకు ఎక్కువ ప్రాధాన్యతనిస్తూ వచ్చారు. ఆయన చేసిన రీమేక్ లలో విజయాలను అందుకున్నవే ఎక్కువ. అలాంటి వెంకటేశ్ తమిళంలో భారీ విజయాన్ని సొంతం చేసుకున్న 'అసురన్'కి రీమేక్ గా 'నారప్ప' సినిమా చేశారు. ఒక సాధారణమైన రైతు తనకున్న కొద్దిపాటి భూమిని కాపాడుకోవడం కోసం చేసే పోరాటంగా ఈ సినిమా నిర్మితమైంది. శ్రీకాంత్ అడ్డాల దర్శకత్వంలో రూపొందిన ఈ సినిమాలో, వెంకటేశ్ సరసన నాయికగా ప్రియమణి నటించింది.

సురేశ్ ప్రొడక్షన్స్ .. కలైపులి థాను కలిసి నిర్మించిన ఈ సినిమా, ఫస్టుకాపీ రెడీ అవుతోందట.  ఒక వారం రోజుల్లో ఫస్టుకాపీ వచ్చేస్తుందని అంటున్నారు. ఇక ఎప్పుడు విడుదల చేయనున్నారనేది త్వరలోనే ప్రకటిస్తారట. అందుకు సంబంధించిన చర్చలు నడుస్తున్నాయని చెబుతున్నారు. వెంకటేశ్ లుక్ .. ఆరంభంలో వదిలిన పోస్టర్లు .. ఆ మధ్య వచ్చిన టీజర్ ఈ సినిమాపై అంచనాలు పెంచాయి. ఈ సినిమా తప్పకుండా ఆయన కెరియర్లో వైవిధ్యభరితమైన చిత్రంగా నిలుస్తుందని అంటున్నారు. మణిశర్మ సంగీతం ఈ సినిమాకి ప్రత్యేకమైన ఆకర్షణ అవుతుందని చెబుతున్నారు.