'బంగార్రాజు'లో చైతూ జోడీగా ప్రియాంక అరుళ్ మోహన్?

తెలుగు తెరకి ఈ మధ్య కాలంలో పరిచయమైన నాజూకైన కథానాయికలలో 'ప్రియాంక అరుళ్ మోహన్' ఒకరు. 'నానీస్ గ్యాంగ్ లీడర్' సినిమా ద్వారా పరిచయమైన ఈ అమ్మాయి, గ్లామర్ పరంగాను .. నటన పరంగాను మంచి మార్కులు కొట్టేసింది. ఆ తరువాత ఇటీవల శర్వానంద్ సరసన 'శ్రీకారం' సినిమాలో ఆడిపాడింది. సినిమా ఫలితం ఎలా ఉన్నప్పటికీ, ప్రియాంక చక్కదనానికి అంతా ఫిదా అయ్యారు. ఇప్పుడు ఈ అమ్మాయి చైతూ జోడీగా 'బంగార్రాజు' సినిమాలో కనిపించనుందనే టాక్ ఒకటి బలంగా వినిపిస్తోంది.

నాగార్జున కథానాయకుడిగా కల్యాణ్ కృష్ణ దర్శకత్వంలో 'బంగార్రాజు' సినిమా రూపొందనుంది. వచ్చేనెలలో ఈ సినిమా సెట్స్ పైకి వెళ్లనుంది. ఈ సినిమాలో నాగార్జున సరసన నాయికగా రమ్యకృష్ణ కనిపించనుంది. ఇక చైతూ జోడీగా సమంత పేరు వినిపించింది. కానీ ఈ సినిమాలో సమంత నటించడం లేదట. ఆ పాత్ర కోసం ప్రియాంక అరుళ్ మోహన్ ను సంప్రదిస్తున్నట్టుగా చెప్పుకుంటున్నారు. ప్రస్తుతం ప్రియాంక అరుళ్ మోహన్ మూడు తమిళ సినిమాలతో బిజీగా ఉంది. 'బంగార్రాజు' సినిమా కోసం ఆమెను సంప్రదించడమనేది ఎంతవరకూ వాస్తవమో చూడాలి.