ముదోల్ నియోజకవర్గం పరిధిలో అభివృద్ధి పనులను సత్వరమే పూర్తి చేయండి: కేసీఆర్

ముదోల్ నియోజకవర్గం పరిధిలో పలు అభివృద్ధి పనులను సత్వరమే పూర్తిచేయాలని ముఖ్యమంత్రి కేసీఆర్ అధికారులను ఆదేశించారు. స్థానిక ఎమ్మెల్యే విఠల్ రెడ్డి ఇవాళ ప్రగతి భవన్ లో ముఖ్యమంత్రిని కలిసి పలు అంశాలను ప్రస్తావించారు. వీటిపై సీఎం సానుకూలంగా స్పందించారు. 6 వేల ఎకరాలకు సాగునీరు అందించేందుకు రూపొందించిన పిప్రి లిఫ్ట్ ఇరిగేషన్ పనులను చేపట్టాలని, గడ్డన్నవాగు ప్రాజెక్టు నిర్మాణంలో మిగిలిన 10 కిలోమీటర్ల పొడవు సీసీ కెనాల్ ను సత్వరమే పూర్తి చేయాలని ఈ సందర్భంగా అధికారులను కేసీఆర్ ఆదేశించారు.

నియోజకవర్గం పరిధిలోని అర్లి వంతెన కూలిపోయే దశలో వున్నందున పునర్నిర్మాణ పనులను చేపట్టాలని, గుండెగావ్ గ్రామం ముంపుకు గురవుతున్నందున గ్రామ ప్రజలను ఆదుకునేందుకు నిర్వాసిత సహాయ కార్యక్రమాలను చేపట్టాలని కేసీఆర్ చెప్పారు. ఈ సమావేశంలో మంత్రి ఇంద్రకరణ్ రెడ్డి, నీటిపారుదల శాఖ ప్రిన్సిపల్ సెక్రటరీ రజత్ కుమార్, సీఎంఓ కార్యదర్శి స్మితా సభర్వాల్ తదితరులు పాల్గొన్నారు.