ఆసుపత్రిలో కేంద్ర ఆరోగ్య మంత్రిపై 'రంగు' పడింది!

ఇటీవల వరదల పాలై డెంగ్యూ జ్వరాల బారిన పడ్డ బీహార్ రాష్ట్రంలో రోగులను పరామర్శించడానికి వెళ్లిన కేంద్ర ఆరోగ్య, కుటుంబ సంక్షేమ శాఖ సహాయ మంత్రి అశ్వనీ చౌబేకు చేదు అనుభవం ఎదురైంది. ఈ రోజు పాట్నా మెడికల్ కాలేజీ హాస్పిటల్ ( పీఎంసీహెచ్)లో డెంగ్యూ పేషెంట్లను ఆయన సందర్శించారు.

అనంతరం పీఎంసీహెచ్ నుంచి బయటకు వస్తున్న సమయంలో రోగి బంధువు ఒకరు మంత్రిపై సిరా చల్లాడు. రాష్ట్రంలో వరదలపై ప్రభుత్వం నిష్క్రియాత్మకంగా వ్యవహరిస్తోందని అరిచాడు. అనంతరం అతడు అక్కడి నుంచి పారిపోయాడు. ఈ ఘటనలో  ఇప్పటివరకు ఎవరిని అరెస్టు చేయలేదు.
 
బీహార్ ఆరోగ్య విభాగం ఇటీవల వెలువరించిన ప్రకటనలో సెప్టెంబరు నుంచి ఇప్పటివరకు 900 డెంగ్యూ కేసులు పాట్నాలో నమోదయ్యాయని పేర్కొంది. భారీ వర్షాలు, వరదలు పరిస్థితిని దిగజార్చగా.. 73 మంది ప్రాణాలు కోల్పోయారు.