చంద్రయాన్-2 ప్రయోగాన్ని ఓ పండుగలా నిర్వహించేందుకు ఇస్రో ఏర్పాట్లు

భారతదేశ అంతరిక్ష చరిత్రలో అత్యంత ముఖ్యమైన ఘట్టం మరికొన్ని గంటల్లో ఆవిష్కృతం కానుంది. ఇప్పటివరకు ఎవరూ పరిశోధించని చంద్రుడి ఆవలి వైపుకు ఇస్రో చంద్రయాన్-2 పేరిట రోదసి యాత్ర నిర్వహిస్తోంది. శ్రీహరికోట రాకెట్ ప్రయోగ కేంద్రం నుంచి జూలై 15న వేకువజామున 2 గంటల 15 నిమిషాలకు చంద్రయాన్-2 ప్రయోగం నిర్వహిస్తారు. దీన్ని ఇస్రో హెవీవెయిట్ రాకెట్ జీఎస్ఎల్వీ ఎంకే-3 (మార్క్-3) అంతరిక్షంలోకి మోసుకుపోనుంది.

కాగా, దేశ ప్రతిష్ఠను ఇనుమడింపచేసే ప్రయోగం కావడంతో ఇస్రో దీనికోసం భారీగా ఏర్పాట్లు చేస్తోంది. సాధారణ ప్రజలు కూడా వీక్షించేలా ఓ ఉత్సవం తరహాలో నిర్వహించాలని తలపోస్తోంది. 10 వేల మంది కూర్చునేలా గ్యాలరీలు, ఆహారపదార్థాల కోసం ప్రత్యేకంగా స్టాళ్లు, ప్రజలు ఉన్న చోట భారీ స్క్రీన్లు ఏర్పాట్లు చేస్తున్నారు.

ఈ ప్రయోగాన్ని ప్రత్యక్షంగా వీక్షించడానికి సాధారణ ప్రజానీకాన్ని అనుమతించడంతో ఇప్పటివరకు 7 వేల మందికి పైగా ఆన్ లైన్ లో తమ వివరాలు రిజిస్టర్ చేసుకున్నారు. భారీ ఎత్తులన ప్రజలు తరలిరానున్న నేపథ్యంలో, సూళ్లూరుపేట నుంచి షార్ కేంద్రం వరకు ప్రత్యేకంగా ఆర్టీసీ బస్సులు ఏర్పాటు చేయాలంటూ ఇస్రో వర్గాలు ఏపీ ప్రభుత్వాన్ని కోరాయి.