అసెంబ్లీ సందర్శనకు వచ్చే వారి సంఖ్య పరిమితం చేయాలి: ఏపీ స్పీకర్ తమ్మినేని ఆదేశం

భద్రతా కారణాల రీత్యా ఏపీ అసెంబ్లీకి వచ్చే సందర్శకుల సంఖ్యను పరిమితం చేయాలని, రోజుకు ఐదువందల మందిని మాత్రమే అనుమతించాలని స్పీకర్ తమ్మినేని సీతారాం ఆదేశించారు. ఏపీ బడ్జెట్ సమావేశాల నిర్వహణపై స్పీకర్ సమీక్ష నిర్వహించారు. ఈ సందర్భంగా ఉన్నతాధికారులకు పలు సూచనలు చేశారు. అసెంబ్లీ సమావేశాలకు భద్రతా ఏర్పాట్లు, బందోబస్తు, సమన్వయం కోసం అసెంబ్లీ ఆవరణలో కమాండ్ కంట్రోల్ రూమ్ ఏర్పాటు చేయాలని ఆదేశించారు. 70 మంది సభ్యులు తొలిసారి అసెంబ్లీలో అడుగుపెట్టారని, వాస్తవిక దృక్పథంతో ఈ సమావేశాలు జరిగేలా కృషి చేద్దామని, సభలో మాట్లాడేందుకు అందరికీ సమాన అవకాశాలు కల్పిస్తామని చెప్పారు.