అవినీతిలో కూరుకుపోయిన పోలీసులు, న్యాయవ్యవస్థ అంతకంటే అవినీతిపరుడైన నానా పాటేకర్ కు క్లీన్ చిట్ ఇచ్చారు: తనుశ్రీ దత్తా ఫైర్

లైంగిక వేధింపుల కేసులో బాలీవుడ్ నటుడు నానా పటేకర్ కు క్లీన్ చిట్ ఇవ్వడంపై నటి తనుశ్రీ దత్తా తీవ్రస్థాయిలో మండిపడ్డారు. అవినీతి పంకిలమైన పోలీసు విభాగం, న్యాయవ్యవస్థ అంతకన్నా కళంకితుడైన నానా పటేకర్ ను ఓ మంచివాడిగా తేల్చాయని ధ్వజమెత్తారు. నానా పటేకర్  దౌర్జన్యం, బెదిరింపులు, వేధింపులకు పాల్పడినట్టు తాను మాత్రమే కాదని, గతంలోనూ అనేకమంది చిత్ర పరిశ్రమకు చెందిన మహిళలు సైతం ఆరోపణలు చేశారని తనుశ్రీ దత్తాను ఉటంకిస్తూ ఓ జాతీయ మీడియా సంస్థ ట్వీట్ చేసింది. కాగా, తనుశ్రీ దత్తా ఫిర్యాదు ఆధారంగా కేసు నమోదు చేసుకున్న పోలీసులు నానాకు వ్యతిరేకంగా ఎలాంటి సాక్ష్యాలు ప్రవేశపెట్టలేకపోవడంతో న్యాయస్థానం క్లీన్ చిట్ ఇవ్వడం తెలిసిందే.