ఇలాంటి వ్యాఖ్యలతో బాధించకండి: నెటిజన్ కు టీవీ యాంకర్ రష్మి హితవు

‘హ్యాపీ మకర సంక్రాంతి’ అంటూ భోగి మంటల వీడియోను ప్రముఖ యాంకర్ రష్మి ట్విట్టర్లో పోస్ట్ చేసింది. అయితే, 'మకర సంక్రాంతి కాదు మేడమ్, అది భోగి, దయచేసి తెలుగు నేర్చుకోండి' అంటూ ఓ నెటిజన్ వ్యాఖ్యలు చేశారు. ఈ వ్యాఖ్యలతో కలత చెందిన రష్మి వెంటనే స్పందించింది.

తమ కుటుంబంలో కేవలం మకర సంక్రాంతిని మాత్రమే జరుపుకుంటామని, అందుకే, ఆ విధంగా విషెస్ తెలుపుతూ ట్వీట్ చేశానని చెప్పింది. 'మీ సంప్రదాయాలను నేను ఎలా అయితే గౌరవించానో, అలానే మీరూ, నన్నూ గౌరవించాలి తప్ప, ఎలాంటి కారణం లేకుండా ఇలాంటి వ్యాఖ్యలతో  బాధించకూడదు' అంటూ ఆ నెటిజన్ కు ఆమె చురకలంటించడం గమనార్హం.

కాగా, ఈ ఏడాది మకర సంక్రాంతి ఎప్పుడన్న విషయాన్ని ‘గూగుల్’లో రష్మి వెతికింది. ‘జనవరి 14, సోమవారం’ అని వచ్చిన సెర్చ్ రిజల్ట్ ని స్క్రీన్ షాట్ తీసి, దాన్ని తన పోస్ట్ ద్వారా రష్మి ట్వీట్ చేసింది.