అత్యుత్తమ ముఖ్యమంత్రిగా మమతా బెనర్జీ.. ‘సీఎం ఆఫ్ ది ఇయర్’ అవార్డుకు ఎంపిక

పశ్చిమ బెంగాల్ ముఖ్యమంత్రి మమతా బెనర్జీ అత్యుత్తమ ముఖ్యమంత్రిగా ఎంపికయ్యారు. రాష్ట్రంలో చేపట్టిన వివిధ అభివృద్ధి పనులు, తీసుకున్న నిర్ణయాలు ఆమెను ఉత్తమ ముఖ్యమంత్రిగా నిలబెట్టాయి. ఈ ఏడాది అత్యుత్తమ పాలన అందించినందుకు గాను స్కోచ్ ‘సీఎం ఆఫ్ ది ఇయర్ అవార్డు’కు మమత ఎంపికయ్యారు. ఈ మేరకు స్కోచ్ బృందం మమతకు శుభాకాంక్షలు తెలిపింది. సుపరిపాలన అందిస్తూ రాష్ట్రాన్ని అగ్రస్థానంలో నిలిపారని ప్రశంసించింది. పట్టణాలు, గ్రామాల అభివృద్ధి, పరిపాలనతో అత్యుత్తమంగా వ్యవహరించినందుకు గాను మమతను ఈ అవార్డుకు ఎంపిక చేసినట్టు తెలిపింది.

పశ్చిమ బెంగాల్‌ ప్రభుత్వం ప్రతిష్ఠాత్మకంగా అమలు చేస్తున్న ‘కన్యశ్రీ’ పథకం ఐక్యరాజ్య సమితి ప్రశంసలు కూడా అందుకుంది. ఈ పథకాన్ని ఆడ శిశువుల సంరక్షణ, పోషణ కోసం అమలు చేస్తునందుకు గాను ‘అత్యున్నత ప్రజాసేవ’ అవార్డుతో ఐక్యరాజ్య సమితి గతేడాది మమతను సత్కరించింది.  అలాగే, కార్మికుల కోసం ‘వంద రోజుల పని’ పథకం కూడా మమతకు మంచి పేరు తీసుకొచ్చింది.