హైదరాబాద్ లో ఎన్టీఆర్ విగ్రహాన్ని ఢీకొన్న కారు.. విరిగిపడ్డ విగ్రహం

హైదరాబాద్, బాలానగర్ రహదారిపై ఉన్న నేతల విగ్రహాలకు రక్షణ లేకుండా పోతోంది. రోడ్డుపై వెళ్తున్న వాహనాలు విగ్రహాలను ఢీకొంటున్నాయి. ఇప్పటికే రాజీవ్ గాంధీ, పీజేఆర్, అంబేద్కర్, జగ్జీవన్ రామ్ ల విగ్రహాలు వాహనాలు ఢీకొనడంతో ధ్వంసమయ్యాయి. తాజాగా నిన్న రాత్రి 9 గంటల సమయంలో సికింద్రాబాద్ నుంచి కూకట్ పల్లి వైపు వెళ్తున్న ఓ కారు ఫిరోజ్ గూడా వద్ద రోడ్డు మధ్యలో ఉన్న ఎన్టీఆర్ విగ్రహాన్ని ఢీకొంది. ఈ ఘటనలో విగ్రహం విరిగి రోడ్డుపై పడింది. దీన్ని గమనించిన టీడీపీ నేతలు కారు డ్రైవర్ సందీప్ ను పట్టుకుని బాలానగర్ పోలీసులకు అప్పగించారు.