లక్ష్య ఛేదనలో ఢిల్లీ ఢమాల్.. చెన్నై ఖాతాలో మరో విజయం

ఐపీఎల్‌లో భాగంగా పూణెలోని మహారాష్ట్ర క్రికెట్ స్టేడియంలో ఢిల్లీ డేర్ డెవిల్స్‌తో జరిగిన మ్యాచ్‌లో చెన్నై సూపర్ కింగ్స్ 13 పరుగుల తేడాతో విజయం సాధించి తన ఖాతాలో మరో విజయాన్ని చేర్చుకుంది. ఇప్పటి వరకు 8 మ్యాచ్‌లు ఆడిన ధోనీ సేన 6 విజయాలు, 12 పాయింట్లతో అగ్రస్థానంలో కొనసాగుతోంది.

ఈ మ్యాచ్‌లో టాస్ ఓడి తొలుత బ్యాటింగ్‌కు దిగిన చెన్నై నిర్ణీత 20 ఓవర్లలో 211 పరుగుల చేసింది. ఓపెనర్ షేన్ వాట్సన్ మరోమారు చెలరేగిపోయాడు. 40 బంతుల్లో 4 ఫోర్లు, 7 సిక్సర్లతో 78 పరుగులు చేశాడు. మరో ఓపెనర్ ఫా డుప్లెసిస్ 33 పరుగులు చేయగా, మూడో స్థానంలో బరిలోకి దిగిన అంబటి రాయుడు 41 పరుగులు చేశాడు. కెప్టెన్ ధోనీ బౌలర్లపై విరుచుకుపడ్డాడు. 22 బంతుల్లో 2 ఫోర్లు, 5 సిక్సర్లతో 51 పరుగులు చేశాడు.

అనంతరం 212 పరుగుల భారీ విజయ లక్ష్యంతో బరిలోకి దిగిన ఢిల్లీ 198 పరుగులు మాత్రమే చేసి పరాజయం పాలైంది. కెప్టెన్సీ చేపట్టిన తొలి మ్యాచ్‌లో రెచ్చిపోయి ఆడి జట్టుకు విజయాన్ని అందించిన శ్రేయాస్ అయ్యర్ ఈ మ్యాచ్‌లో 13 పరుగులకే పెవిలియన్ చేరాడు. వికెట్ కీపర్ రిషబ్ పంత్ 45 బంతుల్లో 7  ఫోర్లు, 4 సిక్సర్లతో 79 పరుగులు చేసినా, జట్టును ఓటమి కోరల్లోంచి తప్పించలేకపోయాడు.

 విజయ్ శంకర్ 54 పరుగులు చేశాడు. చివరి వరకు ఉత్కంఠగా సాగిన ఈ పోరులో చివరికి ధోనీ సేనదే పైచేయి అయింది. 78 పరుగులు చేసి జట్టు విజయంలో కీలక పాత్ర పోషించిన చెన్నై ఓపెనర్ షేన్ వాట్సన్‌కు మ్యాన్ ఆఫ్ ద మ్యాచ్ లభించింది. ఇక, ఈ మ్యాచ్‌లో ఢిల్లీ 6 పరాజయాలతో పాయింట్ల పట్టికలో అట్టడుగున ఉంది. ఐపీఎల్‌లో భాగంగా నేడు రాయల్ చాలెంజర్స్ బెంగళూరు, ముంబై ఇండియన్స్ తలపడనున్నాయి.