ఎన్ని రోజులని చీరే కట్టుకోవాలి?: ప్రగ్యా జైస్వాల్

సంప్రదాయ చీర కట్టులో 'కంచె'లో మెరిసి, తెలుగింటి అమ్మాయిలా మురిపించిన అందాల ముద్దుగుమ్మ ప్రగ్యా జైస్వాల్, ఇప్పుడు చీరలే తనకు అడ్డంకి అయ్యాయని వాపోతోంది. 'కంచె' సినిమా సూపర్ హిట్ కావడంతో, అందులో ప్రగ్యా పోషించిన 'సీత' పాత్ర ప్రతి ఒక్కరికీ కనెక్ట్ అయింది. ఇక ఇటీవల కాస్తంత బోల్డ్ గా ఉన్న డ్రస్ ఆమె వేసుకుని, సోషల్ మీడియాలో పోస్టులు పెట్టగానే, అభిమానుల నుంచి వ్యతిరేక స్పందన వచ్చింది.

మీరు రాకుమారిగా, చీరకట్టులో ఉంటేనే బాగుంటారని చాలా మంది వ్యాఖ్యానించారు. ఇక ఈ వ్యాఖ్యలపై ప్రగ్యా సైతం స్పందించింది. "కంచె సినిమాతో సీత ఓవర్. ప్రతి రోజూ నేను చీరలు కట్టుకోలేను కదా? ఇప్పుడు మరోలా కనిపించాలన్నది నా ఆలోచన" అని స్పష్టం చేసింది. ఓ క్యారెక్టర్ చేసి, ఆ సినిమా హిట్ అయితే, ఆ ఇమేజ్ నుంచి బయటపడటం చాలా కష్టమని అంగీకరించిన ప్రగ్యా, తనకు అన్ని రకాల రోల్స్ చేయడమూ ఇష్టమేనని, గ్లామర్ గా కనిపించడానికి కూడా ఎటువంటి అభ్యంతరాలు లేవని చెప్పుకొచ్చింది. పొట్టి డ్రస్ అయినా, జీన్స్ అయినా, స్క్రిప్ట్ డిమాండ్ మేరకు ఎలాంటి డ్రస్ వేసుకోవడానికైనా సిద్ధమేనని అంది. ఈ దిశగా బ్యాలెన్స్ చేసుకోవాలని ప్రయత్నిస్తున్నట్టు వెల్లడించింది.