వేగంగా రజనీకాంత్ 'ధర్మన్' షూటింగ్.. రెండో షెడ్యూల్ పూర్తి చేసిన సూపర్ స్టార్

సూపర్ స్టార్ రజినీకాంత్ కథానాయకుడిగా, అశ్వత్ మారిముత్తు దర్శకత్వంలో తెరకెక్కుతున్న యాక్షన్ ఎంటర్టైనర్ 'ధర్మన్' (తలైవర్ 173). ఈ సినిమా షూటింగ్ శరవేగంగా జరుగుతోంది. తాజాగా ఈ చిత్రం రెండో షెడ్యూల్ చిత్రీకరణ పూర్తయినట్లు చిత్ర బృందం శుక్రవారం అధికారికంగా ప్రకటించింది.

ఈ చిత్రాన్ని ప్రముఖ నటుడు కమల్ హాసన్ తన సొంత నిర్మాణ సంస్థ రాజ్ కమల్ ఫిల్మ్స్ ఇంటర్నేషనల్ పతాకంపై నిర్మిస్తున్న విషయం తెలిసిందే. ఈ సంస్థ తమ సోషల్ మీడియా ఖాతాలో ఒక ప్రత్యేక వీడియో క్లిప్ విడుదల చేస్తూ, "ధర్మన్ రెండో షెడ్యూల్ పూర్తయింది. స్వాగ్ మోడ్: ఆన్" అని పేర్కొంది. విడుదల చేసిన వీడియోలో రజినీకాంత్ ఒక సీనియర్ మెడికల్ ప్రొఫెసర్‌గా జూనియర్ డాక్టర్లకు లెక్చర్ ఇస్తున్నట్లు కనిపించారు.

ఆగస్టు 13న ఈ సినిమా రెండో షెడ్యూల్ ప్రారంభమైంది. ఆ సమయంలో కూడా "ది డెడ్లీ డాక్టర్.. 'ధర్మన్' షెడ్యూల్ 2 మొదలైంది" అంటూ మేకర్స్ అప్డేట్ ఇచ్చారు. ఈ ప్రాజెక్ట్ ప్రకటించిన నాటి నుంచే అభిమానుల్లో భారీ అంచనాలు నెలకొన్నాయి. జూన్‌లో రజినీకాంత్ లుక్‌ను ఎలా ఫైనల్ చేశారో చూపిస్తూ ఒక మేకింగ్ వీడియోను కూడా విడుదల చేశారు.

ఈ చిత్రంలో రజినీకాంత్ నేరస్థులను ఎదుర్కొనే ఒక డాక్టర్ పాత్రలో నటిస్తున్నారు. గతంలో ఈ సినిమా టైటిల్‌ను ప్రకటిస్తూ కమల్ హాసన్ "ధర్మమే వెల్లుం! (ధర్మమే గెలుస్తుంది)" అని ట్వీట్ చేశారు. విడుదలైన టైటిల్ పోస్టర్‌లో రజినీకాంత్ ఆపరేషన్ థియేటర్‌లో స్కాల్‌పెల్ పట్టుకుని, ఒక రౌడీ షీటర్ శరీరంపై కాలు వేసి నిలబడినట్లు కనిపించడం సినిమాపై ఆసక్తిని మరింత పెంచింది.

ఈ చిత్రానికి అనిరుధ్ రవిచందర్ సంగీతం అందిస్తుండగా, నికేత్ బొమ్మి సినిమాటోగ్రఫీ, ప్రదీప్ ఇ. రాఘవ్ ఎడిటింగ్ బాధ్యతలు నిర్వర్తిస్తున్నారు. జాతీయ అవార్డు గ్రహీతలు అన్బరివ్ స్టంట్లను కొరియోగ్రాఫ్ చేస్తున్నారు. కమల్ హాసన్, ఆర్. మహేంద్రన్ ఈ చిత్రాన్ని నిర్మిస్తుండగా, ఎస్. డిస్నీ సహ నిర్మాతగా వ్యవహరిస్తున్నారు.