బ్యాంకు ఖాతాదారులకు అలర్ట్.. జూన్ నెలలో సెలవుల జాబితా ఇదే!

జూన్ నెలలో బ్యాంకులో ఏమైనా ముఖ్యమైన పనులు ఉన్న ఖాతాదారులు ఈ విషయం తప్పక తెలుసుకోవాలి. భారతీయ రిజర్వ్ బ్యాంక్ (ఆర్బీఐ) 2026 జూన్ నెలకు సంబంధించిన బ్యాంకు సెలవుల జాబితాను విడుదల చేసింది. వారాంతపు సెలవులతో పాటు, వివిధ రాష్ట్రాల్లో ప్రాంతీయ పండుగల కారణంగా పలు రోజులు బ్యాంకులు పనిచేయవు. ఖాతాదారులు ఈ సెలవులను దృష్టిలో ఉంచుకుని తమ పనులను ముందుగానే ప్లాన్ చేసుకోవడం మంచిది.
 
రాష్ట్రాల వారీగా సెలవుల వివరాలు ఇలా:
 
 నెగోషియబుల్ ఇన్‌స్ట్రుమెంట్స్ యాక్ట్ ప్రకారం ఆర్బీఐ ఈ సెలవులను ఖరారు చేస్తుంది. ఎన్డీటీవీ ప్రాఫిట్ నివేదిక ప్రకారం, ఈ సెలవులు రాష్ట్రాల వారీగా మారుతుంటాయి.
 
 జూన్ 15 (సోమవారం): వైఎంఏ డే సందర్భంగా మిజోరాంలో, వ్యవసాయ పండుగ 'రాజా సంక్రాంతి' కారణంగా ఒడిశాలో బ్యాంకులకు సెలవు.
 జూన్ 25 (గురువారం): మొహర్రం సందర్భంగా ఆంధ్రప్రదేశ్‌లో బ్యాంకులకు సెలవు ప్రకటించారు.
 జూన్ 26 (శుక్రవారం): మొహర్రం (యాషురా) కారణంగా తెలంగాణ, ఢిల్లీ, మహారాష్ట్ర, కర్ణాటక సహా పలు రాష్ట్రాల్లో బ్యాంకులు పనిచేయవు.
 జూన్ 29 (సోమవారం): సంత్ గురు కబీర్ జయంతి సందర్భంగా హిమాచల్ ప్రదేశ్‌లో బ్యాంకులకు సెలవు.
 జూన్ 30 (మంగళవారం): 'రెమ్నా ని' సందర్భంగా మిజోరాంలో బ్యాంకులకు ప్రాంతీయ సెలవు ఉంటుంది.
 
వారాంతపు సెలవులు:
 
దేశవ్యాప్తంగా అన్ని బ్యాంకులు ఆదివారాలు (జూన్ 7, 14, 21, 28) మరియు రెండవ, నాల్గవ శనివారాల్లో (జూన్ 13, 27) మూసి ఉంటాయి.
 
 ఆన్‌లైన్ సేవలు యథాతథం:
 
బ్యాంకు శాఖలకు సెలవు ఉన్నప్పటికీ, ఇంటర్నెట్ బ్యాంకింగ్, మొబైల్ బ్యాంకింగ్, ఏటీఎం సేవలు, యూపీఐ (గూగుల్ పే, ఫోన్‌పే) వంటి డిజిటల్ లావాదేవీలు 24 గంటలూ అందుబాటులో ఉంటాయి. అయితే, నగదు డిపాజిట్లు, చెక్కుల క్లియరెన్స్ వంటి పనుల కోసం బ్యాంకులకు వెళ్లేవారు సెలవుల జాబితాను చూసుకుని వెళ్లడం ఉత్తమం.