ఎబోలా కొత్త వేరియంట్కు రష్యా వ్యాక్సిన్!
- ఆఫ్రికాలో బుండిబుగ్యో రకం వైరస్ వ్యాప్తి
- డబ్ల్యూహెచ్ఓ అత్యవసర పరిస్థితి ప్రకటన
- ఇప్పటివరకు లేని అధికారిక చికిత్స, టీకా
- క్లినికల్ ట్రయల్స్ డేటాపై నిపుణుల నిరీక్షణ
- ఆఫ్రికా దేశాలకు రష్యా వైద్య సాయం
ఆఫ్రికాలో ఎబోలా కలకలం
ప్రస్తుతం సెంట్రల్ ఆఫ్రికా దేశాల్లో బుండిబుగ్యో ఎబోలా రకం తీవ్ర కలకలం రేపుతోంది. కాంగోలో దీని తీవ్రత అత్యంత ప్రమాదకర స్థాయికి చేరినట్లు డబ్ల్యూహెచ్ఓ వెల్లడించింది. ఇప్పటికే అక్కడ వందలాది మంది ఈ వైరస్ బారిన పడ్డారు. డజన్ల కొద్దీ మరణాలు సంభవించడంతో అంతటా భయాందోళనలు వ్యక్తమవుతున్నాయి. ఇప్పటివరకు అందుబాటులో ఉన్న ఎబోలా వ్యాక్సిన్లు కేవలం ‘జైర్’ అనే పాత వేరియంట్పై మాత్రమే పనిచేస్తుండటంతో ఈ కొత్త ముప్పును అడ్డుకోవడం వైద్య నిపుణులకు సవాలుగా మారింది.
రష్యా శాస్త్రవేత్తల ముందడుగు
ఇలాంటి క్లిష్ట పరిస్థితుల్లో రష్యా ఆరోగ్య శాఖ మంత్రి మిఖాయిల్ మురాష్కో ఈ కీలక ప్రకటన చేశారు. తమ దేశ పరిశోధకులు తయారు చేసిన కొత్త టీకా ఈ అరుదైన బుండిబుగ్యో వేరియంట్ నుంచి పూర్తి రక్షణ కల్పిస్తుందని ధీమా వ్యక్తం చేశారు. దీనితో పాటు ఆఫ్రికా దేశాలకు ఎబోలా నిర్ధారణ కిట్లు, అవసరమైన వైద్య సాయాన్ని అందిస్తామని రష్యా రాయబార కార్యాలయం తెలిపింది. ప్రస్తుతం బ్రిటన్, అమెరికా పరిశోధకులు కూడా ఈ వైరస్కు విరుగుడు కనిపెట్టే పనిలో నిమగ్నమయ్యారు.
నిపుణుల స్పందన
రష్యా ఆవిష్కరణపై ప్రపంచవ్యాప్తంగా ఆసక్తి నెలకొన్నప్పటికీ అంతర్జాతీయ ఆరోగ్య నిపుణులు మాత్రం కొన్ని సందేహాలు వ్యక్తం చేస్తున్నారు. ఈ వ్యాక్సిన్కు సంబంధించిన క్లినికల్ ట్రయల్స్ డేటాను రష్యా ఇంకా బహిరంగంగా వెల్లడించలేదు. ప్రజల్లోకి ఈ టీకాను విస్తృతంగా తీసుకెళ్లడానికి ముందు మనుషులపై ప్రయోగాలు, శాస్త్రీయ విశ్లేషణలు, ప్రపంచ ఆరోగ్య సంస్థ నుంచి అనుమతులు తప్పనిసరని నిపుణులు స్పష్టం చేస్తున్నారు. అప్పటివరకు వైరస్ నిర్ధారణ, రోగుల ఐసోలేషన్ వంటి నివారణ చర్యలే ప్రధాన ఆయుధాలని పేర్కొంటున్నారు.
