Himanta Biswa Sarma: బహుభార్యత్వానికి పదేళ్ల జైలు.. అసోంలో కొత్త చట్టం

అసోంలో బహుభార్యత్వాన్ని నిషేధిస్తూ రాష్ట్ర ప్రభుత్వం కీలక చట్టాన్ని అమల్లోకి తెచ్చింది. ఇకపై పురుషులు ఒకరి కంటే ఎక్కువ మంది వివాహం చేసుకోవడం రాష్ట్రంలో నేరంగా పరిగణించబడుతుంది. ఈ నిబంధనను ఉల్లంఘించిన వారికి గరిష్ఠంగా పదేళ్ల వరకు కఠిన కారాగార శిక్ష విధించేలా కొత్త చట్టంలో నిబంధనలు పొందుపరిచారు.

ఈ చట్టంపై ముఖ్యమంత్రి హిమంత బిశ్వశర్మ శాసనసభలో మాట్లాడుతూ కీలక వ్యాఖ్యలు చేశారు. బహుభార్యత్వ నిషేధ చట్టం కేవలం ఇస్లాం మతానికి వ్యతిరేకంగా తెచ్చింది కాదని, ఇది అన్ని మతవర్గాలకూ సమానంగా వర్తిస్తుందని ఆయన స్పష్టం చేశారు. రాష్ట్రంలో మహిళల హక్కులను పరిరక్షించేందుకే ఈ నిర్ణయం తీసుకున్నట్లు తెలిపారు.

అయితే, ఈ చట్టానికి ప్రభుత్వం కొన్ని మినహాయింపులు కూడా కల్పించింది. రాజ్యాంగంలోని ఆరో షెడ్యూల్ పరిధిలోని ప్రాంతాల్లో నివసిస్తున్న షెడ్యూల్డ్ తెగల (ఎస్టీ) వారికి ఈ చట్టం వర్తించదని ప్రభుత్వం స్పష్టం చేసింది. సామాజిక సంస్కరణల దిశగా ఈ చట్టాన్ని ఒక ముఖ్యమైన అడుగుగా ప్రభుత్వం భావిస్తోంది.