టాటా మోటార్స్ కొత్త ఎలక్ట్రిక్ కారు.. డీటెయిల్స్ ఇవిగో!

భారతీయ ఆటోమొబైల్ దిగ్గజం టాటా మోటార్స్ తన ఎలక్ట్రిక్ వాహన శ్రేణిని మరింత విస్తరిస్తూ, ఎంతగానో ఎదురుచూస్తున్న హారియర్ ఈవీని మార్కెట్లోకి విడుదల చేసింది. కంపెనీకి చెందిన ఆరు ఎలక్ట్రిక్ మోడళ్ల సరసన ఇది ఫ్లాగ్‌షిప్ ఎస్‌యూవీగా నిలవనుంది. రూ. 21.49 లక్షల (ఎక్స్-షోరూమ్) ప్రారంభ ధరతో వస్తున్న ఈ సరికొత్త ఎలక్ట్రిక్ ఎస్‌యూవీ కోసం బుకింగ్స్ జూలై 2, 2025 నుంచి ప్రారంభం కానున్నాయి. ఈ నేపథ్యంలో, హారియర్ ఈవీ ప్రత్యేకతలు, ఫీచర్లపై ఓ లుక్కేద్దాం.

ప్లాట్‌ఫామ్, డ్రైవ్‌ట్రెయిన్ మరియు డిజైన్
టాటా హారియర్ ఈవీని కంపెనీకి చెందిన అధునాతన యాక్టి.ఈవీ (Acti.ev) ప్లాట్‌ఫామ్ ఆధారంగా నిర్మించారు. ఇది రియర్-వీల్-డ్రైవ్ (RWD) మరియు ఆల్-వీల్-డ్రైవ్ (AWD) కాన్ఫిగరేషన్లలో లభ్యం కానుంది. విశేషమేమిటంటే, టాటా మోటార్స్ మొత్తం పోర్ట్‌ఫోలియోలో (ఇంటర్నల్ కంబషన్ ఇంజన్ - ICE మోడళ్లతో సహా) ఆల్-వీల్ డ్రైవ్ సామర్థ్యంతో వస్తున్న ఏకైక మోడల్ ఈ హారియర్ ఈవీనే కావడం గమనార్హం.

డిజైన్ పరంగా చూస్తే, హారియర్ ఈవీ సాధారణ ఐసీఈ హారియర్ రూపురేఖలనే పోలి ఉంటుంది. అయితే, ఎలక్ట్రిక్ వాహనాలకు ప్రత్యేకమైన మార్పులు చేశారు. ఇందులో పూర్తిగా మూసివున్న గ్రిల్, కొత్తగా తీర్చిదిద్దిన బంపర్లు, ఏరోడైనమిక్స్‌కు అనుకూలంగా ఉండే అల్లాయ్ వీల్స్, మరియు 'ఈవీ' బ్యాడ్జింగ్‌లు ఉన్నాయి. ఈ ఎలక్ట్రిక్ ఎస్‌యూవీ ప్రిస్టైన్ వైట్, నైనిటాల్ నాక్టర్న్, ఎంపవర్డ్ ఆక్సైడ్, మరియు ప్యూర్ గ్రే అనే నాలుగు ఆకర్షణీయమైన రంగుల్లో అందుబాటులో ఉంటుంది.

ఒక్క చార్జింగ్ తో 627 కిలోమీటర్లు
హారియర్ ఈవీ రెండు బ్యాటరీ ప్యాక్ ఆప్షన్లతో వస్తోంది. మొదటిది 65 కిలోవాట్ అవర్ (kWh) యూనిట్, ఇది రియర్ యాక్సిల్‌పై అమర్చిన సింగిల్ మోటార్‌కు శక్తినిస్తుంది. రెండవది పెద్దదైన 75 kWh బ్యాటరీ ప్యాక్. ఇది డ్యూయల్ మోటార్ సెటప్‌తో (ప్రతి యాక్సిల్‌పై ఒకటి) ఆల్-వీల్ డ్రైవ్ ఫంక్షనాలిటీ కోసం అందించారు.

పనితీరు విషయానికొస్తే, ఈ ఎలక్ట్రిక్ ఎస్‌యూవీ గరిష్టంగా 396 హార్స్‌పవర్ శక్తిని, 504 న్యూటన్ మీటర్ల టార్క్‌ను ఉత్పత్తి చేస్తుంది. కేవలం 6.3 సెకన్లలోనే గంటకు 0 నుంచి 100 కిలోమీటర్ల వేగాన్ని అందుకుంటుందని కంపెనీ పేర్కొంది. ఇక రేంజ్ విషయానికొస్తే, టాప్-స్పెక్ వేరియంట్ ఒక్కసారి పూర్తి ఛార్జింగ్‌తో ఎంఐడిసి (MIDC) సర్టిఫైడ్ 627 కిలోమీటర్ల రేంజ్‌ను అందిస్తుందని, ఇది కొనుగోలుదారులలో రేంజ్ ఆందోళనను తొలగిస్తుందని టాటా మోటార్స్ తెలిపింది.

అధునాతన ఫీచర్లు
హారియర్ ఈవీలో ఫీచర్ల జాబితా కూడా ఆకట్టుకునేలా ఉంది. డాష్‌బోర్డులో భారీ 14.5-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్ ప్రధాన ఆకర్షణ కాగా, దీనికి తోడుగా 12.25-అంగుళాల పూర్తి డిజిటల్ ఇన్‌స్ట్రుమెంట్ క్లస్టర్ ఉంది. ఈ ఇన్ఫోటైన్‌మెంట్ స్క్రీన్ కోసం శాంసంగ్ నియో క్యూఎల్‌ఈడీ (Neo QLED) స్క్రీన్‌ను ఉపయోగించినట్లు, మెరుగైన పిక్చర్ క్వాలిటీ అందించడంలో పరిశ్రమలోనే ఇది మొదటిదని కంపెనీ చెబుతోంది.

ఇతర ముఖ్యమైన ఫీచర్లలో వెంటిలేటెడ్ మరియు పవర్డ్ ఫ్రంట్ సీట్లు, పనోరమిక్ సన్‌రూఫ్, ఇల్యూమినేటెడ్ స్టీరింగ్ వీల్, డ్యూయల్-జోన్ క్లైమేట్ కంట్రోల్, వెహికల్-టు-లోడ్ (V2L) మరియు వెహికల్-టు-వెహికల్ (V2V) ఫంక్షనాలిటీలు, డాల్బీ అట్మాస్ 5.1తో కూడిన జేబీఎల్ సౌండ్ సిస్టమ్, నాలుగు డ్రైవ్ మోడ్‌లు, ఆరు టెర్రైన్ మోడ్‌లు ఉన్నాయి.

భద్రత మరియు ఇతర సాంకేతికతలు
భద్రత విషయంలో కూడా హారియర్ ఈవీ ఉన్నత ప్రమాణాలను పాటిస్తోంది. ఇందులో ఆరు ఎయిర్‌బ్యాగ్‌లు, లెవెల్ 2 అడ్వాన్స్‌డ్ డ్రైవర్ అసిస్టెన్స్ సిస్టమ్స్ (ADAS), 360-డిగ్రీ కెమెరా, అంతర్నిర్మిత డాష్‌క్యామ్ వంటివి ఉన్నాయి. ఓవర్-ది-ఎయిర్ (OTA) అప్‌డేట్స్, ఛార్జింగ్ స్టేషన్లలో డిజిటల్ చెల్లింపుల కోసం డ్రైవ్‌పే ఇంటిగ్రేషన్ వంటి సౌకర్యాలు కూడా ఉన్నాయి.

ఈ కారులో మరో ప్రత్యేకమైన ఫీచర్ 540-డిగ్రీ కెమెరా సిస్టమ్. ఇది 360-డిగ్రీల వ్యూనే కాకుండా, కారు కింద భాగాన్ని కూడా డ్రైవర్లు చూడటానికి వీలు కల్పిస్తుంది. టాటా మోటార్స్ ఎలక్ట్రిక్ వాహన విభాగంలో హారియర్ ఈవీ ఒక ముఖ్యమైన ముందడుగుగా నిలుస్తుందని మార్కెట్ వర్గాలు భావిస్తున్నాయి.