black panthers: ఒడిశా అడవుల్లో అరుదైన నల్ల చిరుత.. వీడియో ఇదిగో!

ఒడిశా అడవుల్లో అత్యంత అరుదైన నల్ల చిరుత (బ్లాక్ పాంథర్) సంచరిస్తోందని అటవీ శాఖ అధికారులు తెలిపారు. నల్ల చిరుతలు ఒడిశా అడవుల్లో కేవలం మూడు ప్రాంతాల్లో మాత్రమే ఉన్నాయని వివరించారు. తాజాగా ఈ చిరుత నాయాగఢ్ జిల్లాలోని అటవీ ప్రాంతంలో కెమెరాకు చిక్కిందని ప్రిన్సిపల్ చీఫ్ కన్జర్వేటర్ ప్రేమ్ కుమార్ ట్వీట్ చేశారు. సెంట్రల్ ఒడిశాలో అత్యంత అరుదుగా నల్ల చిరుతలు కనిపిస్తాయని చెప్పారు. జంతువుల కదలికలను, వాటి సంఖ్యను గుర్తించేందుకు అమర్చిన ట్రాప్ కెమెరాలో ఈ బ్లాక్ పాంథర్ కనిపించిందని, బిడ్డను నోట కరిచి తీసుకెళుతున్న దృశ్యాలు కెమెరాకు చిక్కాయని వివరించారు. తన ట్వీట్ కు వీడియోను కూడా జతచేశారు. దీంతో ప్రస్తుతం ఈ వీడియో సోషల్ మీడియాలో వైరల్ గా మారింది.