మరో నాలుగు రోజుల్లో ప్రభాస్, మారుతి సినిమా టైటిల్ పోస్టర్ రిలీజ్!

ప్రభాస్ నుంచి 'ఆది పురుష్' విడుదల దిశగా పనులను జరుపుకుంటూ ఉంటే, ఆ తరువాత సినిమాగా 'సలార్' లైన్లో ఉంది. ఈ నేపథ్యంలో మారుతితో సినిమా చేయడానికి ప్రభాస్ అంగీకరించడం ప్రత్యేకతను సంతరించుకుంది. ఈ ప్రాజెక్టు ఎప్పుడు పట్టాలెక్కుతుంది? అసలు ఈ కాంబినేషన్ పై వస్తున్న వార్తలు నిజమేనా? అనే సందేహాలు చాలామందిలో తలెత్తాయి. 

తాజాగా ఈ సినిమాలో ప్రభాస్ లుక్ కి సంబంధించిన ఫొటో షూట్ జరిగిందని చెబుతున్నారు. ఇప్పటికిప్పుడు ప్రభాస్ పై ఫొటో షూట్ ను నిర్వహించడానికి కూడా కారణం ఉందని అంటున్నారు. ఈ నెల 23వ తేదీన ప్రభాస్ పుట్టినరోజు. ఆ రోజున ఈ సినిమాకి సంబంధించిన టైటిల్ పోస్టర్ ను వదలాలనే ఉద్దేశంతో ఫొటో షూట్ జరిపారని అంటున్నారు. 

విశ్వప్రసాద్ నిర్మిస్తున్న ఈ సినిమాకి 'రాజా డీలక్స్' అనే టైటిల్ ను ఖరారు చేయనున్నారని తెలుస్తోంది. ఒక పాత సినిమాహాలు చుట్టూ తిరిగే కథ ఇది అని అంటున్నారు. తాత - మనవడుగా ప్రభాస్ కనిపించనున్నాడని సమాచారం. ఈ సినిమాలో ముగ్గురు కథానాయికలకు అవకాశం ఉండగా, నిధి అగర్వాల్ - మాళవిక మోహనన్ ను ఆల్రెడీ ఎంపిక చేశారు. రేపటి నుంచి ఈ సినిమా రెగ్యులర్ షూటింగు మొదలుకానుంది.