ఆప్ పంజాబ్ ఎమ్మెల్యే బల్జిందర్ కౌర్‌ను చాచిపెట్టి కొట్టిన భర్త.. వీడియో ఇదిగో

మహిళలపై నేరాలు దారుణంగా పెరిగిపోతున్నాయని జాతీయ నేర గణాంకాల బ్యూరో (ఎన్‌సీఆర్‌బీ) రెండు రోజుల క్రితమే ఓ నివేదిక విడుదల చేసింది. పంజాబ్‌లో మహిళలపై నేరాలు 17 శాతం పెరిగినట్టు పేర్కొంది. ఆ నివేదికపై చర్చ జరుగుతుండగానే సాక్షాత్తూ ఆప్ మహిళా ఎమ్మెల్యే బల్జిందర్ కౌర్‌పై దాడి జరిగింది. ఆమె ఇంట్లో జరిగిన ఈ దాడికి సంబంధించిన వీడియో వెలుగులోకి వచ్చి వైరల్ అవుతోంది. ఈ వీడియో చూసిన నెటిజన్లు ఆగ్రహంతో స్పందిస్తున్నారు. 

ఆ వీడియో ప్రకారం..  భార్యతో వాదులాడుతున్న ఎమ్మెల్యే భర్తను కొందరు పట్టుకుని దూరంగా తీసుకొచ్చారు. ఆ తర్వాత ఎమ్మెల్యేకు, కొంతమంది పురుషులకు మధ్య ఆమె ఇంటి వరండాలో వాగ్వివాదం జరుగుతోంది. అదే సమయంలో మెట్లపై కూర్చున్న ఆయన వద్దకు వచ్చిన బల్జిందర్ కౌర్ మళ్లీ వాగ్వివాదానికి దిగడంతో భర్త ఆమెపై దాడికి దిగాడు. చెంపపై బలంగా కొట్టాడు. 

ఈ వైరల్ వీడియో పంజాబ్ మహిళా కమిషన్ చైర్ పర్సన్ మనీషా గులాటి దృష్టిలో పడింది. దీనిని సుమోటోగా స్వీకరించి చర్యలు తీసుకుంటామని ఆమె తెలిపారు. ప్రజా సమస్యలపై పోరాడే ఓ మహిళ ఇంట్లో వేధింపులకు గురికావడం బాధాకరమని అన్నారు.