Rajamouli: రాజమౌళి క్లాప్ తో ప్రారంభమైన 'ఛత్రపతి' హిందీ రీమేక్!

బెల్లంకొండ శ్రీనివాస్ - వీవీ వినాయక్ కాంబినేషన్లో 'ఛత్రపతి' హిందీ రీమేక్ రూపొందుతోంది. కొన్ని రోజులుగా ఈ ప్రాజెక్టుకు సంబంధించిన సన్నాహాలు జరుగుతున్నాయి. 'పెన్' స్టూడియోస్ వారు ఈ సినిమాను భారీ బడ్జెట్ తో నిర్మిస్తున్నారు. కొంతసేపటి క్రితం హైదరాబాదులో ఈ సినిమా పూజా కార్యక్రమాలను జరుపుకుంది. బెల్లంకొండ శ్రీనివాస్ పై రాజమౌళి క్లాప్ ఇవ్వడంతో ఈ సినిమా షూటింగు లాంఛనంగా ప్రారంభమైంది. తొలి షాట్ కి ప్రముఖ నిర్మాత ఎ.ఎం.రత్నం గౌరవ దర్శకత్వం వహించారు.కథా రచయిత విజయేంద్ర ప్రసాద్ కూడా ఈ కార్యక్రమానికి హాజరయ్యారు. త్వరలోనే ఈ సినిమా రెగ్యులర్ షూటింగు మొదలెట్టనున్నారు. తెలుగులో కొంతకాలం క్రితం రాజమౌళి దర్శకత్వంలో వచ్చిన 'ఛత్రపతి' వసూళ్ల వర్షం కురిపించింది. ప్రభాస్ మాస్ ఇమేజ్ ను అమాంతంగా పెంచేసింది. కథా రచయితగా విజయేంద్రప్రసాద్ ప్రత్యేకతకు ఈ సినిమా అద్దం పడుతుంది. అలాంటి ఈ సినిమాను ఇప్పుడు హిందీలో రీమేక్ చేస్తున్నారు. ఈ సినిమాతోనే బెల్లంకొండ శ్రీనివాస్ బాలీవుడ్ కి పరిచయమవుతున్నాడు. త్వరలోనే మిగతా వివరాలు తెలియనున్నాయి.