Police: అమీర్ పేటలో యువతి పట్ల అసభ్యంగా ప్రవర్తించిన ఆకతాయిని అరెస్ట్ చేసిన పోలీసులు... వీడియో ఇదిగో!

హైదరాబాదులోని పంజాగుట్ట పోలీసులు అమీర్ పేట బస్టాండులో అమ్మాయిని వేధిస్తున్న ఓ ఆకతాయిని అదుపులోకి తీసుకున్నారు. తూర్పు గోదావరి జిల్లాకు చెందిన ఓ యువతి ఇటీవల హైదరాబాదులోని తన సోదరుని వద్దకు వచ్చి తిరిగి సొంత గ్రామానికి వెళ్లేందుకు అమీర్ పేట బస్టాండులో బస్సు కోసం ఎదురుచూస్తోంది. అయితే ఓ యువకుడు ఆమె వద్దకు వచ్చి అసభ్యంగా ప్రవర్తించాడు. తన పేరు మహేశ్ అని, తనతో రావాలని గద్దించాడు. ఆమె నిరాకరించడంతో ఆమెపై దాడికి ప్రయత్నించాడు.

ఈ ఘటనపై సమాచారం అందుకున్న పోలీసులు అక్కడికి రాగా, ఓ పోలీసును చొక్కా పట్టుకుని దాడికి యత్నించాడు. ఎట్టకేలకు అతడిని అదుపులోకి తీసుకున్న పోలీసులు స్టేషన్ కు తరలించి పలు సెక్షన్ల కింద కేసు నమోదు చేశారు. కాగా, ఆ పోకిరీ అమీర్ పేట బస్టాండులో పోలీసులపైనే జులుం చేస్తున్న వీడియో సామాజిక మాధ్యమాల్లో దర్శనమిస్తోంది.