నితిన్ జోడీగా ఛాన్స్ పట్టేసిన రకుల్

'భీష్మ' విజయంతో నితిన్ మంచి జోరుమీద వున్నాడు. ఆ తరువాత సినిమాగా ఆయన 'రంగ్ దే' చేస్తున్నాడు. కీర్తి సురేశ్ కథానాయికగా నటిస్తున్న ఈ సినిమాపై అందరిలో అంచనాలు వున్నాయి. ఈ సినిమా తరువాత ప్రాజెక్టును కూడా నితిన్ సెట్ చేసి పెట్టుకున్నాడు. భవ్య క్రియేషన్స్ బ్యానర్లో ఓ సినిమా రూపొందనుంది. ఈ సినిమాలో కథానాయికగా రకుల్ ప్రీత్ సింగ్ ను ఎంపిక చేశారనేది తాజా సమాచారం.

ఆ మధ్య వరుస పరాజయాలు పలకరించడంతో, రకుల్ వెనుకబడిపోయింది. వరుసగా స్టార్ హీరోలతో సినిమాలు చేస్తూ వెళ్లిన ఆమె, ఒక్కసారిగా ఖాళీ అయింది. దాంతో తమిళ .. హిందీ భాషల్లోను కుదురుకోవడానికి తనవంతు ప్రయత్నాలు చేస్తూనే వుంది. ఈ నేపథ్యంలోనే నితిన్ సినిమా కోసం ఆమెను ఎంపిక చేశారట. ఇక ఈ సినిమా ఎప్పుడు సెట్స్ పైకి వెళుతుందనేది చూడాలి.