Hyderabad: హైదరాబాదులో విద్యార్థులతో వెళ్తున్న ఆటోను ఢీకొన్న ఇసుక లారీ.. ఒకరి మృతి

హైదరాబాద్ హబ్సిగూడలో ఘోర రోడ్డు ప్రమాదం సంభవించింది. స్కూలుకు వెళ్తున్న విద్యార్థి జీవితాన్ని ఓ ఇసుక లారీ బలిగొంది. వివరాల్లోకి వెళ్తే, విద్యార్థులను ఎక్కించుకుని స్కూలుకు వెళ్తున్న ఆటోను ఇసుక లారీ ఢీకొంది. దీంతో ఆటో మూడు పల్టీలు కొట్టింది. ప్రమాద సమయంలో ఎనిమిది మంది విద్యార్థులు ఆటోలో ఉన్నారు.

ఈ ప్రమాదంలో ఓ విద్యార్థి అక్కడికక్కడే ప్రాణాలు కోల్పోయాడు. ఆటోలో ఉన్న మరో ఏడుగురు విద్యార్థులు గాయపడ్డారు. గాయపడ్డవారిని హుటాహుటిన ఆసుపత్రికి తరలించారు. ఈ విద్యార్థులు భాష్యం స్కూలుకు చెందినవారిగా గుర్తించారు. ఉదయం 7.30 గంటలకు ఈ ప్రమాదం చోటు చేసుకుంది.

లారీ డ్రైవర్ మల్లేశ్ పై పోలీసులు ఐపీసీ సెక్షన్లు 304ఏ, 337, 279 కింద కేసు నమోదు చేశారు. మరోవైపు, ప్రమాదం జరిగిన వెంటనే లారీ డ్రైవర్ పరారయ్యాడు. అతని కోసం పోలీసులు గాలిస్తున్నారు.