సెల్ఫోన్లో అశ్లీల పాఠాలు...ఓ అధ్యాపకుడి తీరిది
- బాధిత విద్యార్థిని తల్లిదండ్రుల ఫిర్యాదుతో రంగంలోకి షీ బృందాలు
- కళాశాలకు వెళ్లి విచారణ
- నిజమని తేలడంతో నిందితుడి అరెస్టు
చదువులో వెనుకబడి ఉన్న విద్యార్థినులను గుర్తించి వారికి తన సెల్ఫోన్ నంబరు ఇచ్చేవాడు. సందేహాల కోసం ఫోన్ చేసిన విద్యార్థినులను మెల్లగా ట్రాప్ చేసేవాడు. అలా తన ట్రాప్ లో పడిన వారికి అసభ్యకర మెసేజ్లు, చిత్రాలు పంపుతూ వారిని లైంగిక వేధింపులకు గురిచేస్తున్నాడు. బాధిత విద్యార్థినుల్లో ఒకరు విషయాన్ని తల్లిదండ్రుల దృష్టికి తేవడంతో వారు కమిషనరేట్ వాట్సాప్ నంబర్కు ఫిర్యాదు చేశారు.
దీంతో కమిషనర్ రవీందర్ ఆదేశాల మేరకు షీ బృందం ఇన్స్పెక్టర్ బి.శ్రీనివాస్రావు రంగంలోకి దిగారు. అధ్యాపకుడు పనిచేస్తున్న కళాశాలకు వెళ్లి సిబ్బందిని, విద్యార్థినులను విచారించారు. అధ్యాపకుడి లైంగిక వేధింపులు నిజమేనని తేలడంతో కేసు నమోదుచేసి అతన్ని అరెస్టు చేశారు.
