'సీబీఐ' నాగేశ్వరరావు నియామకంపై పిటిషన్ కొట్టివేత.. విచారణ అవసరం లేదన్న సుప్రీం

గతంలో సీబీఐ ఉన్నతాధికారులైన అలోక్ వర్మ, రాకేశ్ ఆస్థానాల మధ్య ఏర్పడిన వివాదం నేపథ్యంలో సీబీఐ తాత్కాలిక డైరెక్టర్ గా నాగేశ్వరరావును నియమిస్తూ నాడు కేంద్ర ప్రభుత్వం నిర్ణయించింది. కేంద్రం తీసుకున్న ఈ నిర్ణయాన్ని అప్పుడు సీబీఐ డైరెక్టర్ గా ఉన్న అలోక్ వర్మ సవాల్ చేస్తూ సుప్రీంకోర్టును ఆశ్రయించడం, తిరిగి అలోక్ నే ఆ విధుల్లోకి తీసుకోవాలని అత్యున్నత న్యాయస్థానం ఆదేశిండం జరిగింది. అయితే, ఆ తీర్పు వెలువడ్డ రెండురోజుల్లోనే అలోక్ వర్మను ఆ పదవి నుంచి తప్పించి, వేరే శాఖకు బదిలీ చేశారు. దీంతో, మళ్లీ సీబీఐ తాత్కాలిక డైరెక్టర్ గా నాగేశ్వరరావుని కేంద్రం నియమించడం తెలిసిందే.

అయితే, గతంలో జరిగిన ఈ తతంగంపై ‘కామన్ కాజ్’ అనే ఎన్జీవో ప్రశ్నించింది. దీనిని సవాల్ చేస్తూ సుప్రీంకోర్టులో పిటిషన్ దాఖలు చేసింది. ఈ పిటిషన్ పై సీజేఐ రంజన్ గొగొయ్ నేతృత్వంలోని ధర్మాసనం విచారణ చేపట్టింది. ఈ సందర్భంగా ఆసక్తికర వ్యాఖ్యలు చేసింది. సీబీఐకు కొత్త డైరెక్టర్ గా రిషి కుమార్ శుక్లాను నియమించడం జరిగిందని, దీంతో ఇక, ఈ వ్యవహారంలో జోక్యం చేసుకోవాల్సిన అవసరం లేదని తేల్చి చెబుతూ, సదరు పిటిషన్ ను తోసిపుచ్చింది. కాగా, ఈ నెల 4న సీబీఐ కొత్త డైరెక్టర్ గా ఐపీయస్ అధికారి రిషి కుమార్ శుక్లాను కేంద్ర ప్రభుత్వం నియమించింది.