కొత్త స్పిన్నర్ ఇడుగో... ఇక కాచుకోండి: బీసీసీఐ

భారత క్రికెట్ టీమ్ లో స్పిన్ ద్వయం యజువేంద్ర చాహల్, కుల్ దీప్ యాదవ్ లు రాణిస్తుండగా, మూడో వన్డే నేపథ్యంలో, భారత్ కు మరో కొత్త స్పిన్నర్ వచ్చి చేరాడని బీసీసీఐ, తన అధికార వెబ్ సైట్ లో ఓ వీడియోను పోస్టు చేయగా అది వైరల్ గా మారింది. మరికాసేపట్లో భారత్, ఆస్ట్రేలియాల మధ్య మూడో వన్డే మ్యాచ్ జరుగనుండగా, ఈ ఉదయం జరిగిన ప్రాక్టీస్ సెషన్ లో మాజీ కెప్టెన్, వికెట్ కీపర్ ధోనీ, సరదాగా కాసేపు బౌలింగ్ చేశాడు.

దానికి సంబంధించిన వీడియోనే బీసీసీఐ అభిమానులతో పంచుకుంటూ, "భారత స్పిన్ బౌలింగ్ అటాకింగ్ ఎవరు చేరారో చూడండి" అంటూ వ్యాఖ్యానించింది. ఈ వీడియోలో ఆఫ్ బ్రేక్స్, లెగ్ బ్రేక్స్ లను ధోనీ సులువుగా సంధిస్తుండటం కనిపిస్తోంది. కాగా, గతంలోనూ అప్పుడప్పుడు గ్లౌజెస్ పక్కన బెట్టిన ధోనీ, సరదాగా బౌలింగ్ కు దిగిన సంగతి తెలిసిందే.

ఈ తాజా వీడియోను చూసిన పలువురు, ధోనీ మూడో వన్డేలో బౌలింగ్ చేయాలని డిమాండ్ చేస్తుండటం గమనార్హం. తమ అభిమాన ఆటగాడు బ్యాటింగ్, కీపింగ్ తో పాటు, కెప్టెన్సీని, స్పిన్, ఫేస్ బౌలింగ్ ను కూడా వేయగలడని కామెంట్లు పెడుతున్నారు.