40 ఏళ్లు వచ్చేశాయా? ఇలా చేస్తే రిటైర్మెంట్‌ కోసం ఇప్పటికీ కోట్లు కూడబెట్టొచ్చు!

40 ఏళ్లు వచ్చాయంటే పెట్టుబడులు పెట్టడానికి ఆలస్యమైందని చాలామంది భావిస్తారు. పిల్లల చదువులు, ఇంటి ఖర్చులు, ఈఎంఐలు, కుటుంబ బాధ్యతల మధ్య పొదుపు వెనుకబడుతుంది. అయితే ఈ వయసులో పెట్టుబడులు ప్రారంభించినా సంపదను పెంచుకోవడానికి, రిటైర్మెంట్‌ తర్వాత ఆర్థిక భద్రత సాధించడానికి అవకాశం ఉంది. ఇందుకోసం ఆదాయాన్ని సరిగ్గా నిర్వహించడం, క్రమం తప్పకుండా పెట్టుబడి పెట్టడం, రిటైర్మెంట్‌ లక్ష్యాన్ని ముందుగానే నిర్ణయించుకోవడం కీలకం.

ముందుగా మీ ఆర్థిక పరిస్థితిని అంచనా వేయండి
మీ నెలవారీ ఆదాయం ఎంత? ఇంటి ఖర్చులు, అప్పుల చెల్లింపులు, బీమా ప్రీమియంలకు ఎంత వెచ్చిస్తున్నారు? ఎంత మొత్తాన్ని పొదుపు చేయగలుగుతున్నారు? అనే విషయాలను ముందుగా లెక్కించాలి. అనవసర ఖర్చులను తగ్గించి, ఆదాయం పెరిగినప్పుడల్లా పెట్టుబడుల మొత్తాన్ని కూడా పెంచుకోవాలి.

రిటైర్మెంట్‌ కోసం ఎంత డబ్బు అవసరమో ఇప్పటి ఖర్చుల ఆధారంగా లెక్కించాలి. అయితే భవిష్యత్తులో ద్రవ్యోల్బణం వల్ల ధరలు పెరుగుతాయనే విషయాన్ని మర్చిపోవద్దు. ప్రస్తుతం నెలకు రూ.70 వేలతో కుటుంబ ఖర్చులు నిర్వహిస్తున్నవారికి, ఏటా సగటున 6 శాతం ద్రవ్యోల్బణం ఉంటే 20 ఏళ్ల తర్వాత అదే జీవనశైలికి నెలకు సుమారు రూ.2.25 లక్షలు అవసరమవుతాయి. అందుకే ఇప్పటి ఖర్చులను మాత్రమే ఆధారంగా చేసుకుని రిటైర్మెంట్‌ లక్ష్యాన్ని నిర్ణయించకూడదు. 

పెట్టుబడులను ఒకే చోట పెట్టొద్దు
40 ఏళ్లు దాటిన తర్వాత పెట్టుబడులు పెట్టేటప్పుడు రాబడితో పాటు రిస్క్‌ను కూడా పరిగణనలోకి తీసుకోవాలి. మీ రిటైర్మెంట్‌కు ఇంకా 15-20 ఏళ్లు ఉంటే, మీ ఆర్థిక పరిస్థితి, రిస్క్‌ తీసుకునే సామర్థ్యాన్ని బట్టి ఈక్విటీ మ్యూచువల్‌ ఫండ్లు, ఈపీఎఫ్‌, పీపీఎఫ్‌, ఎన్‌పీఎస్‌ వంటి మార్గాలను పరిశీలించవచ్చు. అన్ని డబ్బులనూ ఒకే సాధనంలో పెట్టుబడి పెట్టకుండా విభజించడం మంచిది. 

ప్రతి నెలా పెట్టుబడి పెట్టడం అలవాటు చేసుకోండి
మార్కెట్‌ ఎప్పుడు పెరుగుతుంది? ఎప్పుడు పడిపోతుంది? అని అంచనా వేస్తూ పెట్టుబడులను వాయిదా వేయకూడదు. మీ ఆదాయానికి సరిపోయే మొత్తంతో క్రమం తప్పకుండా పెట్టుబడి ప్రారంభించాలి. మ్యూచువల్‌ ఫండ్లలో సిస్టమాటిక్‌ ఇన్వెస్ట్‌మెంట్‌ ప్లాన్‌ (సిప్‌) ఒక మార్గం. ఆదాయం పెరిగినప్పుడు పెట్టుబడిని కూడా క్రమంగా పెంచుకోవచ్చు. అయితే మార్కెట్‌ ఆధారిత పెట్టుబడుల్లో రాబడికి హామీ ఉండదని గుర్తుంచుకోవాలి. 

అత్యవసర నిధి, బీమా తప్పనిసరి
సంపద పెంచుకోవడమే కాకుండా, ఇప్పటికే ఉన్న ఆర్థిక భద్రతను కాపాడుకోవడం కూడా ముఖ్యం. కనీసం కొన్ని నెలల కుటుంబ ఖర్చులకు సరిపడా అత్యవసర నిధిని ఏర్పాటు చేసుకోవాలి. కుటుంబం మీ ఆదాయంపై ఆధారపడితే తగిన జీవిత బీమా తీసుకోవాలి. వైద్య ఖర్చుల కోసం ఆరోగ్య బీమా కూడా అవసరం. వీటివల్ల అనుకోని పరిస్థితుల్లో దీర్ఘకాలిక పెట్టుబడులను మధ్యలోనే వెనక్కి తీసుకునే పరిస్థితి తగ్గుతుంది. 

ప్రతి ఏడాది ప్రణాళికను సమీక్షించండి
మీ ఆదాయం, ఖర్చులు, కుటుంబ బాధ్యతలు, రిటైర్మెంట్‌ లక్ష్యాలు మారవచ్చు. అందువల్ల ఏడాదికి ఒకసారి పెట్టుబడులను సమీక్షించాలి. అధిక వడ్డీ ఉన్న అప్పులను తగ్గించడం, రిటైర్మెంట్‌ కోసం కేటాయింపులు పెంచడం, పదవీ విరమణకు దగ్గరవుతున్న కొద్దీ పెట్టుబడుల్లో రిస్క్‌ను సమతుల్యం చేయడం అవసరం.

గుర్తుంచుకోవాల్సిన విషయం: 40 ఏళ్ల తర్వాత పెట్టుబడులు ప్రారంభించినా ఆర్థిక భద్రత సాధించే అవకాశం ఉంది. అయితే ఎంత మొత్తాన్ని పెట్టుబడి పెట్టాలి? ఎలాంటి పెట్టుబడులు ఎంచుకోవాలి? అనేది వ్యక్తిగత ఆదాయం, ఖర్చులు, లక్ష్యాలు, రిస్క్‌ సామర్థ్యంపై ఆధారపడి ఉంటుంది.