దావూద్ ఇబ్రహీం భారత్‌లో లేడు, పాక్‌లోనే ఉన్నాడు.. ఐరాసలో స్పష్టం చేసిన ఇండియా

ఉగ్రవాదం, మానవ హక్కులపై ఐక్యరాజ్యసమితి (ఐరాస) ప్రత్యేక ప్రతినిధి రూపొందించిన నివేదికలో ఉన్న వాస్తవ దోషాలను భారత్ ఖండించింది. మోస్ట్ వాంటెడ్ టెర్రరిస్ట్ దావూద్ ఇబ్రహీం భారత్‌లో ఆశ్రయం పొందుతున్నాడంటూ నివేదికలో పేర్కొనడాన్ని తీవ్రంగా తప్పుబట్టింది. ఐరాస వంటి ప్రపంచ స్థాయి సంస్థ ప్రతిష్ఠ‌ను దెబ్బతీసే ఇలాంటి అబద్ధాలను ప్రచురించినందుకు జవాబుదారీతనం ఉండాలని డిమాండ్ చేసింది.

ఉగ్రవాద నిరోధం, మానవ హక్కులపై ఐరాస ప్రత్యేక ప్రతినిధి బెన్ సాల్ జులైలో విడుదల చేసిన తన నివేదికలో.. అల్-ఖైదాతో సంబంధాలున్నందుకు భద్రతా మండలి 2003లో ‘డి కంపెనీ’ నేత దావూద్ ఇబ్రహీంను జాబితాలో చేర్చిందని, అతను భారత్‌లోనే ఉన్నాడని పరోక్షంగా సూచించారు. ఐరాస సమావేశంలో ఈ అంశంపై భారత శాశ్వత ప్రతినిధి బృందంలోని ఫస్ట్ సెక్రటరీ రాఘూ పూరి మాట్లాడుతూ, నివేదికలోని తప్పులను సరిదిద్దారు.

"రికార్డుల కోసం నేను ఈ విషయాన్ని సరిచేస్తున్నాను. ఈ వ్యక్తిని 2003లో జాబితాలో చేర్చడానికి చాలా కాలం ముందే అతను భారత్ నుంచి పారిపోయాడు. విదేశీ గడ్డపై నుంచే అల్-ఖైదా, ఒసామా బిన్ లాడెన్‌తో సంబంధాలున్న కారణంగా అతనిని జాబితాలో చేర్చారు" అని రాఘూ పూరి స్పష్టం చేశారు. 

"ఈ రోజు వరకు, అతను మా దేశంలో మోస్ట్ వాంటెడ్ క్రిమినల్. ఐక్యరాజ్యసమితి లిస్టింగ్ ప్రకారం, ఒసామా బిన్ లాడెన్‌ను కనుగొని, మట్టుబెట్టిన దేశంలోనే (పాకిస్థాన్) అతను నివసిస్తున్నాడు" అని పాకిస్థాన్‌లోని అబొట్టాబాద్‌ను ఉద్దేశించి ఆయన పరోక్షంగా వ్యాఖ్యానించారు.

నివేదికలోని లోపాలను మరింత వివరిస్తూ.. "1993 ముంబై వరుస పేలుళ్ల తర్వాత నుంచే దావూద్ ఇబ్రహీం ఉగ్రవాద కార్యకలాపాల కోసం భారత్‌కు అవసరమైన వాంటెడ్ క్రిమినల్. 1267 ఆంక్షల కమిటీ జాబితాలో ఈ విషయం స్పష్టంగా ఉంది. అలాంటి కీలకమైన వాస్తవాన్ని నివేదికలో ప్రస్తావించకపోవడం చాలా దురదృష్టకరం. ప్రత్యేక ప్రతినిధుల కార్యాలయం నుంచి ఇలాంటి అసమర్థత ఐరాస ప్రతిష్టకు తీవ్ర నష్టం కలిగిస్తుంది" అని పూరి ఆవేదన వ్యక్తం చేశారు.

ఈ నివేదికలోని కొన్ని భాగాల్లో స్పష్టమైన పక్షపాతం కనిపిస్తోందని, ఈ కార్యాలయంపై మీడియాలో వస్తున్న ఆరోపణలు ఆందోళన కలిగిస్తున్నాయని భారత్ పేర్కొంది. అత్యున్నత ప్రమాణాలతో నిష్పాక్షికంగా వ్యవహరించాలని కోరింది. "ఉగ్రవాదానికి నిధులు సమకూర్చే దేశాలు, తమ తప్పుడు పనులను సమర్థించుకోవడానికి మానవ హక్కుల చట్రాన్ని వాడుకోవడం ఒక ఫ్యాషన్‌గా మారిందనిపిస్తోంది" అని పాకిస్థాన్‌ను ఉద్దేశించి ఆయన తీవ్ర వ్యాఖ్యలు చేశారు. 

26/11 ముంబై దాడులతో సహా అనేక ఉగ్రవాద కేసుల్లో నిందితులు పాకిస్థాన్‌లో దశాబ్దాలుగా స్వేచ్ఛగా జీవిస్తున్నారని, అంతర్జాతీయ సమాజం ఆర్థిక సహాయం నిలిపివేస్తుందనే ఒత్తిడి వచ్చినప్పుడు మాత్రమే పాక్ వారిపై నామమాత్రపు చర్యలు తీసుకుంటుందని భారత్ ఎప్పటినుంచో ఆరోపిస్తోంది.

ఈ సమావేశంలో పాకిస్థాన్ ప్రతినిధి జమ్మూకశ్మీర్ అంశాన్ని ప్రస్తావించగా, భారత్ దానిని తీవ్రంగా తోసిపుచ్చింది. అది కేవలం సంకుచిత రాజకీయ ప్రయోజనాల కోసం చేస్తున్న ప్రచార ఆర్భాటమని కొట్టిపారేసింది. "జమ్మూకశ్మీర్, లడఖ్ భారతదేశంలో అంతర్భాగం. ఎప్పటికీ మావే. పాకిస్థాన్ ప్రతినిధి చేసిన వ్యాఖ్యలకు అంతకంటే ఎక్కువ ప్రాధాన్యత ఇవ్వదల్చుకోలేదు" అని రాఘూ పూరి స్పష్టం చేశారు.