సీజేపీ నేతలకు పోలీసుల సమన్లు.. విడుదలైన మరుసటిరోజే మళ్లీ విచారణకు!

జంతర్‌ మంతర్‌ నిరసన కేసులో సీజేపీ నేతలు సౌరవ్‌ దాస్‌, ఆశుతోష్‌ రంకా, అజింక్య షిండేలకు ఢిల్లీ పోలీసులు సమన్లు జారీ చేశారు. గురువారం మధ్యాహ్నం 12 గంటలకు రాజౌరీ గార్డెన్‌లోని క్రైమ్‌ బ్రాంచ్‌ కార్యాలయంలో విచారణకు హాజరుకావాలని ఆదేశించారు. వారం రోజుల పాటు జ్యుడీషియల్‌ కస్టడీలో ఉండి బుధవారం విడుదలైన దాస్‌, రంకాలకు తాజాగా సమన్లు రావడం గమనార్హం.

అక్టోబరు 13న జంతర్‌ మంతర్‌లోకి అనుమతి లేకుండా ప్రవేశించి నిరసన తెలిపిన కేసులో ఈ చర్యలు తీసుకున్నారు. దాస్‌, రంకా, షిండేతో పాటు మరో 11 మందిని పోలీసులు అదుపులోకి తీసుకున్నారు. షిండే బెయిల్‌ బాండ్‌పై విడుదల కాగా, దాస్‌, రంకా మాత్రం వారం రోజుల పాటు జ్యుడీషియల్‌ కస్టడీలో ఉన్నారు. ఈ కేసుల దర్యాప్తును ఢిల్లీ పోలీసులు ఈ వారం క్రైమ్‌ బ్రాంచ్‌కు బదిలీ చేశారు.

ఓటరు జాబితాల ప్రత్యేక సమగ్ర సవరణ (ఎస్‌ఐఆర్‌)లో అక్రమాలు జరుగుతున్నాయంటూ సీజేపీ నేతలు నిరసన చేపట్టిన విషయం తెలిసిందే. ఈ సందర్భంగా ప్రధాన ఎన్నికల కమిషనర్‌ జ్ఞానేశ్‌ కుమార్‌కు వ్యతిరేకంగా నినాదాలు చేశారు.

బుధవారం ప్రత్యేక ఎగ్జిక్యూటివ్‌ మేజిస్ట్రేట్‌ రీతూ రాజ్‌ ఆదేశాలతో దాస్‌, రంకా విడుదలయ్యారు. విచారణ పూర్తయ్యే వరకు ఒక్కొక్కరు రూ.50 వేల వ్యక్తిగత బాండ్‌, ష్యూరిటీ బాండ్‌ సమర్పించారు. శాంతిభద్రతలకు భంగం కలిగించబోమని, చట్టప్రకారం జంతర్‌ మంతర్‌ నిరసన ప్రదేశంగా గుర్తింపు పొందే వరకు అక్కడ నిరసనలకు పిలుపునివ్వబోమని లిఖితపూర్వక హామీ ఇచ్చారు.