క్యాన్సర్ నుంచి బ్రెయిన్ సర్జరీ వరకు.. ప్రాణాంతక వ్యాధులను జయించిన బాలీవుడ్ తారలు

వెండితెరపై మనల్ని అలరించే తారల జీవితం ఎప్పుడూ రంగులమయంగా, ఆరోగ్యంగా కనిపిస్తుంది. కానీ, కెమెరా వెనుక వారు కూడా మనలాంటి సాధారణ మనుషులే. తీవ్రమైన ఆరోగ్య సమస్యలను ఎదుర్కొని, ప్రాణాంతక వ్యాధులతో పోరాడి, వాటిని జయించి ఎందరికో స్ఫూర్తిగా నిలిచిన బాలీవుడ్ సెలబ్రిటీలు ఎందరో ఉన్నారు. క్యాన్సర్, నాడీ సంబంధిత వ్యాధులు, ఆటో ఇమ్యూన్ సమస్యలు వంటి ఎన్నో సవాళ్లను వారు ధైర్యంగా ఎదుర్కొన్నారు. తమ అనుభవాలను పంచుకుంటూ, ముందస్తు నిర్ధారణ, సరైన వైద్యం ప్రాముఖ్యతపై అవగాహన కల్పిస్తున్నారు.

క్యాన్సర్‌పై గెలిచిన యోధులు
బాలీవుడ్‌లో క్యాన్సర్‌పై విజయం సాధించిన వారిలో నటి మనీషా కొయిరాలా ముందు వరుసలో ఉంటారు. 2012లో ఆమెకు స్టేజ్ 4 అండాశయ క్యాన్సర్ ఉన్నట్టు నిర్ధారణ అయింది. న్యూయార్క్‌లో కఠినమైన శస్త్రచికిత్స, కీమోథెరపీ చికిత్స తీసుకుని ఆమె సంపూర్ణంగా కోలుకున్నారు. అప్పటి నుంచి క్యాన్సర్‌పై అవగాహన కల్పిస్తూ, తన అనుభవాలతో పుస్తకం కూడా రాశారు.

అదేవిధంగా నటి సోనాలి బింద్రే 2018లో మెటాస్టాటిక్ క్యాన్సర్‌తో పోరాడారు. న్యూయార్క్‌లో చికిత్స తీసుకున్న ఆమె, ఆ సమయంలో తన కుటుంబం అందించిన మద్దతు ఎంతో కీలకమని పదేపదే చెబుతుంటారు.

రచయిత్రి, ఫిల్మ్‌మేకర్ తాహిరా కశ్యప్ రొమ్ము క్యాన్సర్ ప్రారంభ దశలో ఉన్నప్పుడు గుర్తించి, మాస్టెక్టమీ చేయించుకున్నారు. రొమ్ము క్యాన్సర్‌పై ఉన్న అపోహలను తొలగిస్తూ, మహిళల్లో చైతన్యం నింపుతున్నారు. నటి లీసా రే 2009లో ప్లాస్మా కణాలకు సోకే మల్టిపుల్ మైలోమా అనే అరుదైన క్యాన్సర్‌తో పోరాడారు. 

స్టెమ్ సెల్ ట్రాన్స్‌ప్లాంట్ చేయించుకున్న ఆమె, సరైన వైద్య పర్యవేక్షణతో వ్యాధిని నియంత్రణలో ఉంచుకోవచ్చని నిరూపించారు. దర్శకుడు అనురాగ్ బసు 2004లో బ్లడ్ క్యాన్సర్‌ను జయించి, ఆ తర్వాత ‘బర్ఫీ’ వంటి అద్భుతమైన చిత్రాలను అందించారు. అయితే, న్యూరోఎండోక్రైన్ ట్యూమర్‌తో పోరాడిన విలక్షణ నటుడు ఇర్ఫాన్ ఖాన్ 2020లో మరణించడం బాలీవుడ్‌కు తీరని లోటు.

ఇతర తీవ్రమైన ఆరోగ్య సవాళ్లు
బాలీవుడ్ కండల వీరుడు సల్మాన్ ఖాన్ ముఖంలో తీవ్రమైన నొప్పిని కలిగించే ట్రైజెమినల్ న్యూరల్జియా అనే నాడీ సంబంధిత వ్యాధితో బాధపడ్డారు. దాంతో పాటు బ్రెయిన్ అనూరిజం కూడా ఉందని ఆయనే స్వయంగా వెల్లడించారు. 

గ్రీక్ గాడ్ హృతిక్ రోషన్ 2013లో తీవ్రమైన తలనొప్పి కారణంగా వైద్యులను సంప్రదించగా, మెదడులో రక్తం గడ్డకట్టినట్లు (సబ్డ్యూరల్ హెమటోమా) గుర్తించారు. వెంటనే బ్రెయిన్ సర్జరీ చేయించుకున్న ఆయన, పూర్తి ఆరోగ్యంతో తిరిగి వచ్చి కఠినమైన యాక్షన్ చిత్రాల్లో నటించడం అందరినీ ఆశ్చర్యపరిచింది.

‘దంగల్’ ఫేమ్ ఫాతిమా సనా షేక్ తాను ఎపిలెప్సీ (మూర్ఛ వ్యాధి)తో బాధపడుతున్నట్లు ధైర్యంగా ప్రకటించారు. మొదట్లో భయపడ్డా, ఇప్పుడు దానిని ఎలా నియంత్రించుకోవాలో తెలుసుకున్నానని, తన సహోద్యోగులకు కూడా ఈ విషయంలో అవగాహన కల్పించానని తెలిపారు. 

నటుడు అర్జున్ కపూర్ థైరాయిడ్ గ్రంథిపై ప్రభావం చూపే ఆటో ఇమ్యూన్ వ్యాధి 'హషిమోటో డిసీజ్' తో పాటు, డిప్రెషన్‌తో కూడా పోరాడినట్లు చెప్పారు.

ఈ తారల కథలు కేవలం వారి పోరాట పటిమను మాత్రమే కాదు, ఏ అనారోగ్య లక్షణాలను నిర్లక్ష్యం చేయకూడదని, సరైన సమయంలో వైద్యులను సంప్రదించడం ఎంత ముఖ్యమో నొక్కి చెబుతున్నాయి. మానసిక, శారీరక ఆరోగ్యం రెండూ ముఖ్యమని, కుటుంబ సహకారంతో ఎలాంటి గండాన్నైనా గెలవవచ్చని ఈ సెలబ్రిటీలు తమ జీవితాల ద్వారా ఆదర్శంగా నిలుస్తున్నారు.