'ఆర్‌సీ17' లాంచ్‌పై క్లారిటీ.. దేవిశ్రీ ఉంటారా? ఉండరా?.. ఫుల్ డీటెయిల్స్ ఇచ్చిన నిర్మాత!

మెగా పవర్ స్టార్ రామ్ చరణ్, క్రియేటివ్ డైరెక్టర్ సుకుమార్ కాంబినేషన్‌లో ఎంతో ప్రతిష్టాత్మకంగా తెరకెక్కనున్న 'ఆర్‌సీ17' సినిమాపై కీలక అప్‌డేట్ వచ్చింది. దసరా పండుగ సందర్భంగా ఈ సినిమా పూజా కార్యక్రమాలతో ప్రారంభమవుతుందని భావించిన అభిమానులకు మైత్రీ మూవీ మేకర్స్ నిర్మాత రవి శంకర్ స్పష్టతనిచ్చారు. 'దొంగ నా కొడుకు' టీజర్ లాంచ్ ఈవెంట్‌లో ఆయన మాట్లాడుతూ, సినిమా ప్రారంభోత్సవం వాయిదా పడినట్లు ధ్రువీకరించారు.

"దసరాకు పూజ అనుకున్నాం. కానీ ఈసారి ఏదో మూఢం ఉందని చెప్పారు. అందుకే అక్టోబర్ 26 లేదా 27న మంచి ముహూర్తం చూసి ప్రారంభోత్సవం చేస్తాం" అని రవి శంకర్ తెలిపారు. దీంతో సినిమా లాంచ్‌పై ఉన్న అనిశ్చితికి తెరపడింది.

ఇదే సమయంలో గత కొన్ని రోజులుగా సోషల్ మీడియాలో హాట్ టాపిక్‌గా మారిన మ్యూజిక్ డైరెక్టర్ విషయంపై కూడా ఆయన సుదీర్ఘంగా వివరణ ఇచ్చారు. సుకుమార్ సినిమా అంటే దేవిశ్రీ ప్రసాద్ ఉంటారని అందరూ భావిస్తారు. అయితే, ఈ సినిమాకు అనిరుధ్‌ను తీసుకుంటున్నారనే ప్రచారంతో దేవిశ్రీ అభిమానులు నిరాశ చెందారు. ఈ విషయంపై రవి శంకర్ స్పందిస్తూ, సంగీత దర్శకుడి ఎంపిక పూర్తిగా దర్శకుడు సుకుమార్ చేతుల్లో ఉంటుందని స్పష్టం చేశారు.

"దేవిశ్రీ ప్రసాద్ స్టార్ మ్యూజిక్ కంపోజర్. సుకుమార్-దేవి కాంబినేషన్ ఇప్పటిదాకా మిస్ అవ్వలేదనే ఈ చర్చ నడుస్తోంది. ఆయన ఈ సినిమాలో లేకపోతే తక్కువ అవుతారని అనుకోవడం తప్పు. ఇది పూర్తిగా డైరెక్టర్ నిర్ణయం. సుకుమార్ ప్రస్తుతం లండన్‌లో ఉన్నారు, ఆయన తిరిగి వచ్చాక తుది నిర్ణయం తీసుకుంటారు" అని వివరించారు.

దేవిశ్రీ ప్రసాద్‌తో తమ సంస్థకున్న అనుబంధాన్ని గుర్తుచేసుకుంటూ.. "మేము ఆయనతో 7 సినిమాలు చేశాం. 'శ్రీమంతుడు', 'జనతా గ్యారేజ్', 'రంగస్థలం', 'పుష్ప' సిరీస్ లాంటి ఎన్నో ఆణిముత్యాల్లాంటి ఆల్బమ్స్ ఇచ్చారు. ఇప్పటికీ మా సంస్థలో దేవిశ్రీ ప్రసాద్ కంటే గొప్ప మ్యూజిక్ డైరెక్టర్ లేరు. ఒకే సంగీత దర్శకుడితో కాకుండా కొత్త వారితో పనిచేయాలని దర్శకుడికి అనిపించొచ్చు. ఒకవేళ నిర్ణయం అదే అయితే, దేవి కూడా అర్థం చేసుకుంటారు. ఆయన మాకు కుటుంబ సభ్యుడిలాంటి వారు" అని నిర్మాత రవి శంకర్ అన్నారు.

ప్రస్తుతానికి సినిమాటోగ్రాఫర్‌తో సహా ఏ సాంకేతిక నిపుణుడినీ ఖరారు చేయలేదని, సుకుమార్ భారత్ తిరిగి వచ్చాకే 'ఆర్‌సీ17'  పూర్తి వివరాలు అధికారికంగా ప్రకటిస్తామని ఆయన తెలిపారు.