విజయవాడలో భారీగా బంగారం, విదేశీ కరెన్సీ పట్టివేత

అక్రమంగా తరలిస్తున్న  బంగారం, విదేశీ కరెన్సీని డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ) అధికారులు స్వాధీనం చేసుకున్నారు. విజయవాడ కేంద్రంగా నిర్వహించిన ఈ మెరుపు దాడిలో సుమారు రూ.5.84 కోట్ల విలువైన స్మగ్లింగ్ సొత్తును పట్టుకోవడంతో పాటు ఐదుగురు నిందితులను అరెస్ట్ చేశారు. బంగ్లాదేశ్ నుంచి కోల్‌కతా మీదుగా హైదరాబాద్‌కు ఈ ముఠా అక్రమ రవాణా చేస్తున్నట్లు అధికారులు గుర్తించారు.

డీఆర్ఐ హైదరాబాద్, విజయవాడ యూనిట్ల అధికారులు సంయుక్తంగా ఈ ఆపరేషన్ చేపట్టారు. విశ్వసనీయ సమాచారం మేరకు విజయవాడ శివారులో హైదరాబాద్ వైపు వెళ్తున్న ఒక స్కార్పియో వాహనాన్ని ఆపి తనిఖీ చేశారు. వాహనంలో ప్రత్యేకంగా ఏర్పాటు చేసిన రహస్య అరలో 60,000 అమెరికన్ డాలర్లు, 21,500 యూరోలను గుర్తించారు. వాహనంలోని వ్యక్తులను విచారించగా వెల్లడైన సమాచారం ఆధారంగా, సమీపంలోని టోల్ ప్లాజా వద్ద ఒక ప్రైవేట్ బస్సును అడ్డగించారు.

సదరు బస్సులో ప్రయాణిస్తున్న ముగ్గురు వ్యక్తులను తనిఖీ చేయగా, వారి నడుముకు కట్టుకున్న పౌచ్‌లలో 3,147.1 గ్రాముల బరువున్న మూడు బంగారు కడ్డీలు లభ్యమయ్యాయి. పట్టుబడిన బంగారం, విదేశీ కరెన్సీ మొత్తం విలువ సుమారు రూ.5.84 కోట్లు ఉంటుందని అధికారులు అంచనా వేశారు.

ఈ స్మగ్లింగ్ వ్యవహారంతో ప్రమేయం ఉన్న ఐదుగురు నిందితులను అరెస్ట్ చేసి న్యాయస్థానంలో హాజరుపరిచారు. ఈ ముఠాకు అంతర్జాతీయ స్మగ్లర్లతో ఉన్న సంబంధాలపై డీఆర్ఐ అధికారులు దర్యాప్తు జరుపుతున్నారు.